Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Hagai 1:1-15

1  Na mbula ya mibale ya mokonzi Dariuse,+ na sanza ya motoba, na mokolo ya liboso ya sanza yango, liloba ya Yehova eyaki na nzela ya mosakoli Hagai+ mpo na Zerubabele+ mwana ya Shealatiele,+ guvɛrnɛrɛ ya Yuda+ mpe mpo na Yosua+ mwana ya Yehozadake+ nganga-nzambe monene ete:  “Talá oyo Yehova ya mampinga+ alobi: ‘Bato oyo balobi ete: “Ntango ekómi naino te, ntango ya kotonga ndako ya Yehova.”’”+  Mpe liloba ya Yehova ekobaki koya na nzela ya mosakoli Hagai ete:  “Oyo nde ntango bino bosengeli kofanda mpenza na bandako na bino oyo eyeisami kitoko na mabaya,+ awa ndako oyo etikali mpamba?+  Mpe talá oyo Yehova ya mampinga alobi: ‘Bótya motema na bino na banzela na bino.+  Boloni mboto mingi, kasi oyo bozali kokɔtisa na ebombelo ezali kaka moke.+ Kolya bozali kolya, kasi bozali kotonda te.+ Komɛla bozali komɛla, kasi bozali kolangwa te. Bilamba bozali kolata, kasi moto moko te azali kozwa mɔtɔ; mpe moto oyo azali kosala mpo na lifuti, azali kotya lifuti na ye na saki oyo ezali na madusu.’”+  “Talá oyo Yehova ya mampinga alobi: ‘Bótya motema na bino na banzela na bino.’+  “‘Bómata na ngomba, mpe bóya na mabaya.+ Mpe bótonga ndako,+ mpo nasepela na yango+ mpe mpo nazwa nkembo,’+ Yehova alobi bongo.”  “‘Bolukaki kozwa mingi, kasi talá bozwi kaka moke;+ mpe bokɔtisaki yango na ndako, mpe nafulaki yango mopɛpɛ+—mpo na nini?’+ yango nde liloba ya Yehova ya mampinga. ‘Mpo na ndako na ngai oyo etikali mpamba, awa bino bozali kopota mbangu, moto na moto na ndako na ye moko.+ 10  Bongo mpo na bino likoló ekangi mamwɛ na yango, mpe mabele ekangi mbuma na yango.+ 11  Mpe nakobaki kokaukisa mabele, bangomba, mbuma, vinyo ya sika,+ mafuta, eloko nyonso oyo mabele ekobimisa, mosala makasi nyonso ya mabɔkɔ, mpe natikaki yango enyokola moto ya mabele, mpe nyama ya mboka.’”+ 12  Mpe Zerubabele+ mwana ya Shealatiele, ná Yosua mwana ya Yehozadake+ nganga-nzambe monene, mpe batikali nyonso kati na bato, babandaki koyoka mongongo ya Yehova Nzambe na bango,+ mpe maloba ya mosakoli Hagai,+ ndenge Yehova Nzambe na bango atindaki ye; mpe bato bakómaki kobanga Yehova.+ 13  Mpe Hagai momemi-nsango+ ya Yehova akobaki koloba na bato na kolanda etinda oyo momemi-nsango azwaki epai ya Yehova+ ete: “‘Nazali elongo na bino,’+ yango nde liloba ya Yehova.” 14  Mpe Yehova alamwisaki elimo+ ya Zerubabele mwana ya Shealatiele, guvɛrnɛrɛ ya Yuda, mpe elimo ya Yosua+ mwana ya Yehozadake nganga-nzambe monene mpe elimo ya batikali nyonso kati na bato; mpe babandaki kokɔta mpe kosala mosala na ndako ya Yehova ya mampinga, Nzambe na bango.+ 15  Yango ezalaki na mokolo ya ntuku mibale na minei (24) ya sanza ya motoba na mbula ya mibale ya mokonzi Dariuse.+

Maloba na nse