Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Ebandeli 23:1-20

23  Mpe bomoi ya Sara ezalaki mbula nkama moko na ntuku mibale na nsambo (127). Yango nde mbula ya bomoi ya Sara.+  Bongo Sara akufaki na Kiriate-arba,+ elingi koloba, Hebrone,+ na mokili ya Kanana,+ mpe Abrahama akɔtaki kolela Sara makasi mpe alelaki ye na kobimisa mpisoli.  Bongo Abrahama atɛlɛmaki, alongwe liboso ya ebembe na ye, mpe abandaki koloba na bana ya Hete+ ete:  “Ngai nafandi mopaya epai na bino mpe nazali moto oyo autá na mboka mosusu.+ Bópesa ngai esika ya kokunda bibembe kati na bino mpo nakunda ebembe na ngai, elongwa na miso na ngai.”+  Na yango, bana ya Hete bayanolaki Abrahama mpe balobaki na ye ete:  “Yoká biso, nkolo na ngai.+ Kati na biso, yo ozali nkumu ya Nzambe.+ Kundá ebembe na yo na malita na biso oyo eleki kitoko.+ Moto moko te kati na biso akoboyela yo lilita na ye mpo okunda ebembe na yo.”+  Na yango, Abrahama atɛlɛmaki mpe agumbamaki liboso ya bana-mboka,+ liboso ya bana ya Hete,+  mpe asololaki na bango na maloba oyo: “Soki milimo na bino endimi nakunda ebembe na ngai, elongwa na miso na ngai, bóyoka ngai mpe bóbondela Efrone mwana ya Zohare mpo na ngai,+  ete apesa ngai mobenga ya Makapela,+ oyo ezali ya ye, oyo ezali na nsuka ya elanga na ye. Tiká ye apesa ngai yango na kati na bino na ntalo mobimba ya palata mpo nazwa esika ya kokunda bibembe.”+ 10  Nzokande, Efrone afandaki kati na bana ya Hete. Bongo Efrone Mohiti+ ayanolaki Abrahama na matoi ya bana ya Hete elongo na baoyo nyonso bazalaki kokɔta na porte ya engumba na ye ete:+ 11  “Te, nkolo na ngai! Yoká ngai. Napesi yo mpenza elanga, mpe napesi yo mpenza mobenga oyo ezali kati na yango. Napesi yo mpenza yango na miso ya bana ya bato na ngai.+ Kundá ebembe na yo.” 12  Na yango, Abrahama agumbamaki liboso ya bana-mboka 13  mpe alobaki na Efrone na matoi ya bana-mboka ete: “Soki kaka yo—te, yoká ngai! Nakopesa yo ntalo ya palata mpo na elanga. Kamatá yango na lobɔkɔ na ngai,+ mpo nakunda ebembe na ngai kuna.” 14  Bongo Efrone ayanolaki Abrahama mpe alobaki na ye ete: 15  “Nkolo na ngai, yoká ngai. Eteni ya mabele ya motuya ya shekele nkama minei (400) ya palata, ezali nini kati na ngai ná yo? Na bongo, kundá ebembe na yo.”+ 16  Na yango, Abrahama ayokelaki Efrone, mpe Abrahama atyelaki Efrone na kilo ntalo ya palata oyo alobaki na matoi ya bana ya Hete, shekele ya palata nkama minei (400) oyo bato ya mombongo bazalaki kosalela.+ 17  Na yango, elanga ya Efrone oyo ezalaki na Makapela, oyo etalani na Mamare, elanga yango ná mobenga oyo ezalaki kati na yango mpe na banzete nyonso oyo ezalaki na elanga,+ oyo ezalaki kati na bandelo na yango nyonso epai na epai, endimamaki+ 18  ete ekómi esika oyo Abrahama asombi na miso ya bana ya Hete kati na baoyo nyonso bazalaki kokɔta na porte ya engumba na ye.+ 19  Mpe nsima na yango, Abrahama akundaki Sara mwasi na ye na mobenga ya elanga ya Makapela oyo etalani na Mamare, elingi koloba, Hebrone, na mokili ya Kanana.+ 20  Bongo elanga mpe mobenga oyo ezalaki kati na yango endimamaki na mabɔkɔ ya bana ya Hete ete ekómi ya Abrahama mpo ezala esika ya kokunda bibembe.+

Maloba na nse