Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Ebandeli 17:1-27

17  Ntango Abrama akómaki na mbula ntuku libwa na libwa (99), Yehova abimelaki Abrama mpe alobaki na ye ete:+ “Ngai nazali Nzambe Mozwi-ya-Nguya-Nyonso.+ Tambolá liboso na ngai mpe zalá na mbeba te.+  Mpe nakotya kondimana na ngai kati na ngai ná yo,+ mpo nakómisa yo mingi, mingi mpenza.”+  Na yango, Abrama akweaki elongi na nse,+ mpe Nzambe akobaki kosolola na ye, alobaki ete:  “Mpo na ngai, talá! kondimana na ngai ezali elongo na yo,+ mpe okokóma mpenza tata ya ebele ya bikólo.+  Mpe bakobenga yo lisusu te na nkombo Abrama, kasi nkombo na yo ekozala nde Abrahama, mpamba te nakokómisa yo tata ya ebele ya bikólo.  Mpe nakosala ete obota mingi, mingi mpenza mpe nakokómisa yo bikólo, mpe bakonzi bakobima kati na yo.+  “Mpe nakokokisa kondimana na ngai oyo ezali kati na ngai ná yo+ mpe ná momboto na yo, oyo ekoya nsima na yo, na mabota na bango mpo na kondimana moko ya ntango oyo etyami ndelo te,+ mpo namonisa ete nazali Nzambe na yo mpe ya momboto na yo, oyo ekoya nsima na yo.+  Mpe nakopesa yo mpe momboto na yo, oyo ekoya nsima na yo, mokili ya bisika oyo ofandaki mopaya,+ ɛɛ mokili mobimba ya Kanana, mpo ezala ya bino mpo na ntango oyo etyami ndelo te; mpe nakomonisa ete nazali Nzambe na bango.”+  Mpe Nzambe alobaki lisusu na Abrahama ete: “Kasi yo, okobatela kondimana na ngai, yo ná momboto na yo, oyo ekoya nsima na yo, na mabota na bango.+ 10  Talá kondimana na ngai oyo bokobatela, kati na ngai ná bino, ɛɛ momboto na yo, oyo ekoya nsima na yo:+ Mobali nyonso kati na bino asengeli kokatama ngenga.+ 11  Mpe bosengeli kokatama ngenga na mosuni ya misutu na bino, mpe yango esengeli kozala elembo ya kondimana kati na ngai ná bino.+ 12  Mpe mobali nyonso kati na bino, oyo azali na mikolo mwambe, asengeli kokatama ngenga,+ na boumeli ya mabota na bino, mobali nyonso oyo abotami na ndako na yo mpe mobali nyonso oyo asombami na mbongo epai ya mopaya nyonso oyo auti na momboto na yo te. 13  Mobali nyonso oyo abotami na ndako na yo mpe mobali nyonso oyo asombami na mbongo na yo asengeli mpenza kokatama ngenga;+ mpe kondimana na ngai kati na mosuni na bino esengeli kozala kondimana ya ntango oyo etyami ndelo te.+ 14  Mpe mobali oyo akatami ngenga te, oyo mosuni ya mosutu na ye ekokatama te, ɛɛ molimo yango esengeli kolongolama kati na bato na ye.+ Abuki kondimana na ngai.” 15  Mpe Nzambe alobaki lisusu na Abrahama ete: “Mpo na Sarai, mwasi na yo, osengeli kobenga ye na nkombo Sarai te, mpamba te Sara nde nkombo na ye.+ 16  Mpe nakopambola ye mpe lisusu nakopesa yo mwana mobali na nzela na ye;+ mpe nakopambola ye mpe akokóma bikólo;+ bakonzi ya bato ya bikólo bakobima kati na ye.”+ 17  Na yango, Abrahama akweaki elongi na nse mpe abandaki kosɛka mpe koloba na motema na ye ete:+ “Mobali ya mbula monkama (100) akobota mwana, mpe Sara, ɛɛ mwasi ya mbula ntuku libwa (90) akobota?”+ 18  Nsima na yango, Abrahama alobaki na Nzambe ya solo ete: “Ee tiká Yishimaele azala na bomoi liboso na yo!”+ 19  Na yango, Nzambe alobaki ete: “Sara, mwasi na yo, azali mpenza kobotela yo mwana mobali, mpe osengeli kopesa ye nkombo Yisaka.+ Mpe nakosala kondimana na ngai elongo na ye mpo ezala kondimana moko ya ntango oyo etyami ndelo te mpo na momboto na ye, oyo ekoya nsima na ye.+ 20  Kasi mpo na Yishimaele, nayoki yo. Talá! Nakopambola ye mpe nakosala ete abota mingi mpe nakokómisa ye mingi, mingi mpenza.+ Akobimisa bankumu zomi na mibale, mpe nakokómisa ye ekólo moko monene.+ 21  Nzokande, kondimana na ngai nakosala yango ná Yisaka,+ oyo Sara akobotela yo na ntango ya boye na mbula ekoya.”+ 22  Na yango, Nzambe asilisaki kosolola na ye mpe amataki, atiki Abrahama.+ 23  Bongo Abrahama akamataki Yishimaele, mwana na ye ya mobali, mpe mibali nyonso oyo babotami na ndako na ye mpe mobali nyonso oyo asombami na mbongo na ye, mobali nyonso kati na bato ya ndako ya Abrahama, mpe abandaki kokata mosuni ya misutu na bango kaka na mokolo yango, se ndenge Nzambe asololaki na ye.+ 24  Mpe Abrahama azalaki na mbula ntuku libwa na libwa (99) ntango akatamaki mosuni ya mosutu na ye.+ 25  Mpe Yishimaele, mwana na ye ya mobali, azalaki na mbula zomi na misato ntango akatamaki mosuni ya mosutu na ye.+ 26  Na mokolo yango kaka, Abrahama akatamaki ngenga, mpe Yishimaele, mwana na ye ya mobali.+ 27  Mpe mibali nyonso kati na bato ya ndako na ye, mobali nyonso oyo abotami na ndako mpe mobali nyonso oyo asombami na mbongo epai ya mopaya, akatamaki ngenga elongo na ye.+

Maloba na nse