Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

Ebandeli 14:1-24

14  Bongo esalemaki boye: na mikolo ya Amirafele mokonzi ya Shinare,+ Arioke mokonzi ya Elasare, Kedolaomere+ mokonzi ya Elame,+ mpe Tidale mokonzi ya Goyime,+  bakonzi yango babundaki na Bera mokonzi ya Sodoma,+ mpe Birisha mokonzi ya Gomora,+ Shinabe mokonzi ya Adema+ mpe Shemebere mokonzi ya Zeboyime,+ mpe mokonzi ya Bela (elingi koloba, Zoare).+  Bango nyonso wana, basalaki boyokani,+ bakendaki tii na Lobwaku ya Patatalu ya Sidime,+ elingi koloba, Mbu ya Mungwa.+  Basalelaki Kedolaomere mbula zomi na mibale, kasi na mbula ya zomi na misato batombokaki.  Mpe na mbula ya zomi na minei Kedolaomere ayaki, ná bakonzi oyo bazalaki elongo na ye, mpe balongaki Barefaime na Asheterote-karnaime,+ mpe Bazuzime na Hame, mpe Baemime+ na Shave-kiriataime,  mpe Bahori+ na ngomba na bango ya Seire,+ tii na Ele-parane,+ oyo ezali na esobe.  Bongo babalukaki mpe bayaki tii na Ene-mishipate, elingi koloba, Kadeshe,+ mpe balongaki mokili mobimba ya Baamaleke+ ná Baamore+ oyo bazalaki kofanda na Hazazone-tamara.+  Na yango, mokonzi ya Sodoma abandaki kotambola, ná mokonzi ya Gomora mpe mokonzi ya Adema mpe mokonzi ya Zeboyime mpe mokonzi ya Bela (elingi koloba, Zoare), mpe basalaki molɔngɔ ya etumba mpo na kobunda na bango na Lobwaku ya Patatalu ya Sidime,+  mpo na kobunda na Kedolaomere mokonzi ya Elame mpe Tidale mokonzi ya Goyime mpe Amirafele mokonzi ya Shinare mpe Arioke mokonzi ya Elasare;+ bakonzi minei bábunda na bakonzi mitano yango. 10  Nzokande Lobwaku ya Patatalu ya Sidime+ ezalaki kaka mabulu na mabulu ya gudrɔ;+ mpe bakonzi ya Sodoma mpe ya Gomora+ babandaki kokima mpe bakweaki na mabulu yango, mpe baoyo batikalaki bakimaki na etúká ya ngombangomba.+ 11  Bongo baoyo balongaki bakamataki biloko nyonso ya Sodoma mpe ya Gomora mpe bilei na bango nyonso mpe bakendaki.+ 12  Bakamataki mpe Lota mwana ya ndeko ya Abrama mpe biloko na ye mpe basimbaki nzela bakei. Na ntango yango, Lota azalaki kofanda na Sodoma.+ 13  Nsima na yango, moto moko oyo abikaki na etumba ayaki kopesa nsango na Abrama Moebre.+ Na ntango yango, Abrama azalaki kofanda na bahema na katikati ya banzete minene ya Mamare Moamore,+ ndeko ya Eshikole mpe ndeko ya Anere;+ mpe bazalaki bato oyo basalaki kondimana ná Abrama. 14  Bongo Abrama ayokaki ete bakangi ndeko na ye.+ Na yango, ayanganisaki mibali na ye oyo babongisamá mpo na etumba,+ baombo nkama misato na zomi na mwambe (318) oyo babotamaki na ndako na ye,+ mpe alandaki bango tii na Dani.+ 15  Mpe na butu akabolaki mampinga na ye,+ ye ná baombo na ye, mpo na kobunda na bango, na bongo alongaki bango mpe alandaki bango tii na Hoba, oyo ezali na nɔrdi ya Damasi. 16  Mpe azwaki biloko nyonso oyo babɔtɔlaki,+ azwaki mpe Lota ndeko na ye ná biloko na ye ná basi mpe bato.+ 17  Bongo mokonzi ya Sodoma abimaki kokutana na Abrama, nsima wana autaki kolonga Kedolaomere mpe bakonzi oyo bazalaki elongo na ye, na Lobwaku ya Patatalu ya Shave, elingi koloba, Lobwaku ya Patatalu ya mokonzi.+ 18  Mpe Melekisedeke,+ mokonzi ya Saleme,+ abimisaki mampa mpe vinyo,+ mpe azalaki nganga-nzambe ya Nzambe Oyo-Aleki-Likoló.+ 19  Bongo apambolaki ye mpe alobaki ete: “Abrama apambolama na Nzambe Oyo-Aleki-Likoló,+ Oyo abimisá likoló ná mabele;+ 20  Mpe Nzambe Oyo-Aleki-Likoló apambolama,+ Ye oyo akabi banyokoli na yo na lobɔkɔ na yo!”+ Na yango, Abrama apesaki ye moko ya bandambo zomi ya biloko nyonso.+ 21  Nsima na yango, mokonzi ya Sodoma alobaki na Abrama ete: “Pesá ngai milimo,+ kasi yo kamatá biloko.” 22  Na yango, Abrama alobaki na mokonzi ya Sodoma ete: “Natomboli mpenza lobɔkɔ na ngai mpe nalapi ndai,+ epai ya Yehova Nzambe Oyo-Aleki-Likoló, Oyo abimisá likoló ná mabele, 23  ete, nakokamata eloko moko te na biloko na yo,+ ɛɛ, banda na busi tii na nsinga ya sandale, noki oloba ete: ‘Ngai nde moto nakómisi Abrama mozwi.’ 24  Ngai nakokamata ata eloko moko te!+ Longola kaka oyo bilenge mibali basili kolya, mpe likabo ya mibali oyo bakendaki elongo na ngai, Anere, Eshikole mpe Mamare+—tiká bango bázwa likabo na bango.”+

Maloba na nse