Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

2 Samwele 4:1-12

4  Ntango mwana+ ya Saulo ayokaki ete Abinere akufi na Hebrone,+ mabɔkɔ na ye elɛmbaki+ mpe makanisi ya Bayisraele nyonso ebulunganaki.  Mpe ezalaki na mibali mibale, bakonzi ya bituluku ya bapunzi+ ya mwana ya Saulo; mosusu nkombo na ye Baana mpe mosusu nkombo na ye Rekabe, bana ya Rimone Mobeerote,+ na kati ya bana ya Benyamina; mpo Beerote mpe ezalaki kotángama engumba ya Benyamina.  Mpe Babeerote bakimaki na Gitaime,+ mpe bakómaki kofanda bapaya kuna tii na mokolo ya lelo.  Nzokande Yonatane+ mwana ya Saulo azalaki na mwana moko ya mobali oyo azalaki kotɛnguma.+ Azalaki na mbula mitano ntango nsango ya Saulo ná Yonatane eutaki na Yizireele;+ bongo mwasi oyo azalaki kobatela ye amemaki ye mpe akimaki, kasi esalemaki boye: ntango azalaki kopota mbangu na nsɔmɔ mpo na kokima, mwana yango akweaki mpe akómaki kotɛnguma. Nkombo na ye Mefiboshete.+  Mpe Rekabe ná Baana, bana ya Rimone Mobeerote, bakendaki mpe bakómaki na ndako ya Ishi-boshete+ pene na ntango oyo moi engalaki makasi, wana alalaki mwa mpɔngi ya midi.  Bongo bakɔtaki tii na katikati ya ndako lokola bato bazali kozwa blé, mpe na nsima babɛtaki ye na libumu;+ mpe moto moko te amonaki Rekabe ná ndeko na ye Baana.+  Ntango bakɔtaki na ndako yango, ye alalaki na mbeto na ye na shambrɛ na ye ya kati, bongo babɛtaki ye mpe babomaki ye;+ na nsima, bakataki ye motó+ mpe bazwaki motó na ye mpe batambolaki butubutu na nzela oyo ezali kokende na Araba.  Nsukansuka, bamemaki motó ya Ishi-boshete+ epai ya Davidi na Hebrone mpe balobaki na mokonzi ete: “Talá motó ya Ishi-boshete mwana ya Saulo monguna+ na yo, oyo azalaki koluka molimo na yo;+ kasi na mokolo ya lelo, Yehova azongiseli+ Saulo ná bana na ye mabe mpo na nkolo na ngai mokonzi.”  Kasi Davidi ayanolaki Rekabe ná ndeko na ye Baana, bana ya Rimone Mobeerote, mpe alobaki na bango ete: “Lokola Yehova oyo asikolaki+ molimo na ngai+ na bampasi nyonso+ azali solo na bomoi,+ 10  ntango moto moko ayaki koyebisa ngai+ ete: ‘Talá Saulo akufi,’ mpe akanisaki ete amemi nsango ya malamu, ngai nakangaki ye mpe nabomaki+ ye na Ziklage, atako esengelaki napesa ye lifuti oyo bapesaka momemi-nsango; 11  bongo ekozala boni ntango bato mabe+ mpenza babomi moyengebene na kati ya ndako na ye moko na mbeto na ye? Sikoyo, nasengeli nde kosɛnga makila na ye na mabɔkɔ na bino te,+ mpe nasengeli nde kolongola bino na mokili te?”+ 12  Na yango, Davidi apesaki bilenge mibali mitindo, babomaki bango,+ bakataki bango mabɔkɔ ná makolo mpe bakakisaki+ bango pene na liziba ya Hebrone; bongo bazwaki motó ya Ishi-boshete mpe bakundaki yango na lilita ya Abinere, na Hebrone.+

Maloba na nse