Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Samwele 7:1-17

7  Na yango, bato ya Kiriate-yearime+ bayaki mpe bamatisaki sanduku ya Yehova mpe bakendaki na yango na ndako ya Abinadabe+ na ngomba moke, mpe basantisaki Eleazare mwana na ye ya mobali, mpo abatelaka sanduku ya Yehova.  Mpe esalemaki boye: banda mokolo oyo Sanduku efandaki na Kiriate-yearime, mikolo ezalaki se kobakisama, tii ekokisaki mbula ntuku mibale (20), mpe ndako mobimba ya Yisraele balelelaki Yehova.+  Mpe Samwele alobaki na ndako mobimba ya Yisraele ete: “Soki ezali na motema na bino mobimba nde bozali kozongela Yehova,+ bólongola kati na bino banzambe ya bapaya+ mpe bikeko ya Ashitorete,+ mpe bóbalusa motema na bino mobimba epai ya Yehova mpe bósalela kaka ye,+ mpe ye akobikisa bino na lobɔkɔ ya Bafilistia.”+  Na yango, bana ya Yisraele balongolaki Babaala+ mpe bikeko ya Ashitorete+ mpe babandaki kosalela kaka Yehova.  Na nsima, Samwele alobaki boye: “Bóyanganisa Yisraele+ mobimba na Mizipa,+ mpo nabondela+ Yehova mpo na bino.”  Bongo bayanganisamaki na Mizipa, mpe batokaki mai mpe basopaki yango liboso ya Yehova mpe bakilaki bilei na mokolo yango.+ Mpe babandaki koloba kuna ete: “Tosaleli Yehova lisumu.”+ Mpe Samwele akómaki kosambisa+ bana ya Yisraele na Mizipa.  Bongo Bafilistia bayaki koyoka ete bana ya Yisraele bayangani na Mizipa, mpe bankolo ya lisangani+ ya Bafilistia bamataki kobundisa Yisraele. Ntango bana ya Yisraele bayokaki yango, bakómaki kobanga mpo na Bafilistia.+  Na yango, bana ya Yisraele balobaki na Samwele boye: “Kofanda nyɛɛ te, kotika te kobelela Yehova, Nzambe na biso, mpo na kosɛngela biso lisalisi,+ mpo abikisa biso na lobɔkɔ ya Bafilistia.”  Bongo Samwele azwaki mwana-mpate oyo ezali naino komɛla mabɛlɛ mpe apesaki yango likabo ya kotumba, likabo ya mobimba,+ epai ya Yehova; mpe Samwele abandaki kobelela Yehova mpo na kosɛngela Yisraele lisalisi,+ mpe Yehova apesaki ye eyano.+ 10  Mpe esalemaki boye: ntango Samwele azalaki kopesa likabo yango ya kotumba, Bafilistia bapusanaki pene mpo na kobundisa Yisraele. Kasi Yehova abɛtiselaki Bafilistia bankake na lokito moko makasi+ na mokolo yango, mpo na kotya bango na mobulungano;+ mpe Yisraele elongaki bango.+ 11  Na yango, mibali ya Yisraele babimaki na Mizipa mpe balandaki Bafilistia mpe babomaki bango tii na sudi ya Bete-kare. 12  Na nsima, Samwele azwaki libanga+ moko mpe atyaki yango kati na Mizipa ná Yeshana mpe apesaki yango nkombo Ebenezere. Na yango, alobaki ete: “Tii sikoyo, Yehova asalisi biso.”+ 13  Ndenge wana nde Bafilistia batyamaki na nse, mpe bakɔtaki lisusu na teritware ya Yisraele te;+ mpe lobɔkɔ ya Yehova ezalaki se kobunda na Bafilistia na mikolo nyonso ya Samwele.+ 14  Mpe bingumba oyo Bafilistia bazwaki na Yisraele ezalaki se kozongela Yisraele, banda na Ekrone tii na Gate, mpe teritware na yango, Yisraele abikisaki yango na lobɔkɔ ya Bafilistia. Mpe kimya ekɔtaki kati na Yisraele ná Baamore.+ 15  Bongo Samwele akobaki kosambisa Yisraele mikolo nyonso ya bomoi na ye.+ 16  Mpe mbula na mbula, azalaki kokende, aleki na Betele,+ na Gilgale+ mpe na Mizipa+ mpe azalaki kosambisa Yisraele+ na bisika wana nyonso. 17  Kasi azalaki kozonga na Rama,+ mpamba te ndako na ye ezalaki wana, mpe kuna, azalaki kosambisa Yisraele. Mpe atongelaki Yehova etumbelo moko kuna.+

Maloba na nse