Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Samwele 5:1-12

5  Nzokande Bafilistia bazwaki sanduku+ ya Nzambe ya solo mpe na nsima, bamemaki yango uta na Ebenezere tii na Ashedode.+  Bongo Bafilistia bazwaki sanduku ya Nzambe ya solo mpe bakɔtisaki yango na ndako ya Dagone mpe batyaki yango pembeni ya Dagone.+  Na nsima, bato ya Ashedode balamukaki ntɔngɔntɔngɔ na mokolo oyo elandaki, mpe talá Dagone akwei elongi na nse liboso ya sanduku ya Yehova.+ Na yango, bazwaki Dagone mpe bazongisaki ye na esika na ye.+  Ntango balamukaki ntɔngɔntɔngɔ na mokolo oyo elandaki, talá Dagone akwei elongi na nse liboso ya sanduku ya Yehova, motó ya Dagone mpe mabɔkɔ na ye nyonso ekatani, ezalaki liboso ya monɔkɔ ya ndako.+ Kaka eteni na ye oyo ezali lokola mbisi nde etikalaki.  Yango wana banganga-nzambe ya Dagone mpe bato nyonso oyo bakɔtaka na ndako ya Dagone banyataka te esika oyo ezali liboso ya monɔkɔ ya ndako ya Dagone na Ashedode tii na mokolo ya lelo.  Mpe lobɔkɔ ya Yehova+ efinaki bato ya Ashedode, mpe ayokisaki bango nsɔmɔ mpe apesaki bango, elingi koloba, Ashedode ná bateritware na yango, maladi ya mosomba.+  Mpe bato ya Ashedode bayaki komona ete ezalaki bongo mpe balobaki ete: “Bótika te ete sanduku ya Nzambe ya Yisraele efanda na biso, mpamba te lobɔkɔ na ye ezali kofina biso ná nzambe na biso Dagone.”+  Na yango, batindaki bato mpe bayanganisaki bankolo nyonso ya lisangani ya Bafilistia epai na bango mpe balobaki boye: “Tokosala nini na sanduku ya Nzambe ya Yisraele?” Nsukansuka, balobaki ete: “Sanduku ya Nzambe ya Yisraele eleka tii na Gate.”+ Bongo bamemaki sanduku ya Nzambe ya Yisraele tii kuna.  Mpe esalemaki boye: nsima ya komema yango tii kuna, lobɔkɔ ya Yehova+ ekitelaki engumba yango, ekɔtisaki mobulungano monene mpenza mpe abandaki kobɛta mibali ya engumba yango, banda na oyo ya moke tii na oyo ya monene, mpe misomba+ ebandaki kobima bango. 10  Na yango, batindaki sanduku ya Nzambe ya solo na Ekrone.+ Mpe esalemaki boye: ntango kaka sanduku ya Nzambe ya solo ekómaki na Ekrone, bato ya Ekrone babandaki koganga, balobi: “Bamemi sanduku ya Nzambe ya Yisraele tii epai na ngai mpo báboma ngai ná bato na ngai!”+ 11  Yango wana batindaki bato mpe bayanganisaki bankolo nyonso ya lisangani ya Bafilistia mpe balobaki boye: “Bótika sanduku ya Nzambe ya Yisraele ekende, ezonga na esika na yango mpo eboma ngai ná bato na ngai te.” Mpamba te mobulungano moko ya liwa ekɔtaki na engumba mobimba;+ kuna lobɔkɔ ya Nzambe ya solo efinaki bango makasi,+ 12  mpe bato oyo bakufaki te babɛlaki maladi ya mosomba.+ Mpe kolela+ ya engumba yango mpo na kosɛnga lisalisi ezalaki se komata tii na likoló.

Maloba na nse