Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Samwele 21:1-15

21  Na nsima, Davidi akómaki na Nobe,+ epai ya nganga-nzambe Ahimeleke; mpe Ahimeleke+ akómaki kolɛnga ntango akutanaki na Davidi, bongo alobaki na ye boye: “Mpo na nini ozali yo moko, mpe moto moko te azali elongo na yo?”+  Na yango, Davidi alobaki na nganga-nzambe Ahimeleke boye: “Mokonzi ye moko apesi ngai mitindo mpo na likambo moko,+ mpe alobaki na ngai ete: ‘Moto moko ayeba ata eloko te na likambo oyo nazali kotinda yo mpe oyo napesi yo mitindo.’ Bongo nayokanaki na bilenge mibali tókutana na esika boye mpe boye.  Mpe sikoyo, soki ozali na mampa mitano, pesá yango na lobɔkɔ na ngai, to eloko nyonso oyo ekoki komonana.”+  Kasi nganga-nzambe ayanolaki Davidi mpe alobaki boye: “Na lobɔkɔ na ngai, mampa ya mpamba ezali te, mampa mosantu nde ezali;+ ekopesama kaka soki bilenge mibali yango basanganaki na basi te.”+  Na yango, Davidi ayanolaki nganga-nzambe mpe alobaki na ye boye: “Kasi basi batyamaki mosika na biso lokola liboso ntango nazalaki kobima,+ mpe nzoto ya bilenge mibali yango ezalaka mosantu, ata soki batindami na mosala ya mpamba. Bongo lelo, na ntango moto akómi mosantu na nzoto na ye, ekozala boni?”  Na yango, nganga-nzambe apesaki ye oyo ezali mosantu,+ mpamba te kuna mampa mosusu ezalaki te, kaka mampa ya kolakisa oyo elongolamaki liboso ya Yehova+ mpo bátya mampa ya sika wana, na mokolo oyo balongolaki yango.  Nzokande, mosaleli moko ya Saulo azalaki wana na mokolo yango, likambo moko ekangisaki+ ye liboso ya Yehova, mpe nkombo na ye ezalaki Doege+ Moedome,+ kapita ya babateli ya mpate ya Saulo.+  Mpe Davidi alobaki lisusu na Ahimeleke boye: “Bongo ozali na eloko moko te, ezala likɔnga to mopanga? Mpo nazwaki na lobɔkɔ na ngai ata mopanga na ngai te, to bibundeli na ngai te, mpamba te likambo ya mokonzi esengelaki kosalema nokinoki.”  Na yango, nganga-nzambe alobaki ete: “Mopanga ya Goliate,+ Mofilistia oyo obomaki na lobwaku ya patatalu ya Ela,+ yango oyo, elíngami na kazaka moko, nsima ya efode.+ Soki okozwa yango, zwá, mpo mosusu ezali awa te, kaka yango.” Bongo Davidi alobaki lisusu boye: “Mosusu lokola yango ezali te. Pesá ngai yango.” 10  Na nsima, Davidi atɛlɛmaki mpe akobaki kokima+ Saulo na mokolo yango, mpe nsukansuka akómaki epai ya Akishe, mokonzi ya Gate.+ 11  Mpe basaleli ya Akishe bakómaki koloba na ye boye: “Oyo Davidi te, mokonzi+ ya mokili yango? Ye nde moto oyo bazalaki se koyembela na mondimo+ mpe na mabina ete: ‘Saulo abomi oyo ya ye bankóto, Mpe Davidi abomi oyo ya ye bankóto zomi zomi’?”+ 12  Bongo Davidi abandaki kokanisa maloba yango na motema na ye, mpe akómaki kobanga+ Akishe mokonzi ya Gate makasi. 13  Na yango, akosaki+ ete azali na ligboma na miso+ na bango mpe abandaki kosala lokola moto ya ligboma na lobɔkɔ na bango mpe azalaki kokomakoma bilembo na bizipeli ya porte mpe azalaki kotangisa nsoi na mandefu na ye. 14  Nsukansuka, Akishe alobaki na basaleli na ye ete: “Bomoni ete moto oyo azali na ligboma. Bongo mpo na nini boyei na ye epai na ngai? 15  Nazangi nde bato ya ligboma, mpo bóya na oyo asalela ngai makambo ya ligboma? Moto ya boye akɔta na ndako na ngai?”

Maloba na nse