Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Samwele 13:1-23

13  Saulo azalaki na mbula [?]* ntango abandaki koyangela,+ mpe ayangelaki Yisraele mbula mibale.  Mpe Saulo aponaki mibali nkóto misato (3 000) na Yisraele; bongo mibali nkóto mibale (2 000) bazalaki elongo na Saulo na Mikemashe+ mpe na etúká ya ngombangomba ya Betele, mpe mibali nkóto moko (1 000) bazalaki elongo na Yonatane+ na Gibea+ ya Benyamina, mpe atikaki bato mosusu oyo batikalaki bákende, moto na moto na hema na ye.  Na nsima, Yonatane abomaki etuluku ya basoda+ ya Bafilistia+ oyo ezalaki na Geba;+ mpe Bafilistia bayokaki yango. Nzokande Saulo atindaki báyula liseke+ na mokili mobimba, alobi: “Tiká Baebre báyoka!”  Mpe Yisraele mobimba eyokaki bato bazali koloba ete: “Saulo abomi etuluku moko ya basoda ya Bafilistia, mpe sikoyo Bafilistia bayini+ Yisraele.” Na yango, bato bayanganisamaki mpo na kolanda Saulo na Gilgale.+  Bongo Bafilistia mpe, na ngámbo na bango, bayanganaki mpo na kobunda na Yisraele: makalo+ ya bitumba nkóto ntuku misato (30 000), basoda nkóto motoba (6 000) oyo batambolaka na mpunda mpe bato ya etumba ebele lokola bambuma ya zɛlo oyo ezali pembenipembeni ya mbu;+ mpe basimbaki nzela bamati mpe batyaki kaa na Mikemashe, na ɛsti ya Bete-avene.+  Bongo bato ya Yisraele bamonaki ete makambo eyelaki bango ndongo,+ mpamba te bato bazalaki na nkaka makasi; mpe bato bakendaki komibomba na kati ya mibenga+ mpe ya mabulu, mpe na mabanga mpe na biteni ya ndako ya nse oyo nsamba na yango egumbamá mpe na mabulu ya mai.  Baebre bakatisaki kutu Yordani+ mpo na kokende na mokili ya Gade+ mpe ya Gileade. Kasi Saulo azalaki naino na Gilgale, mpe bato nyonso ya etumba bazalaki kolɛnga ntango bazalaki kolanda ye.+  Bongo azelaki mikolo nsambo tii na ntango oyo etyamaki, oyo Samwele alobaki;+ kasi Samwele akómaki na Gilgale te, mpe bato ya etumba bazalaki kopanzana mpe kotika ye.  Nsukansuka, Saulo alobaki boye: “Bóyela ngai mbeka wana ya kotumba mpe bambeka ya boyokani.” Na yango, apesaki mbeka yango ya kotumba.+ 10  Mpe esalemaki boye: ntango kaka asilisaki kopesa mbeka yango ya kotumba, talá, Samwele azali kokɔta. Na yango, Saulo abimaki kokutana na ye mpe kopambola ye.+ 11  Bongo Samwele alobaki ete: “Osali nini?”+ Na yango Saulo alobaki boye: “Namonaki ete bato ya etumba bapanzani mpe batiki ngai,+ mpe yo, oyaki te na mikolo oyo etyamaki,+ mpe Bafilistia bazalaki koyanganisama na Mikemashe,+ 12  yango wana nalobaki na motema na ngai+ ete: ‘Sikoyo Bafilistia bakokitela ngai na Gilgale, mpe naino nakitisi Yehova motema te.’ Yango wana nazwaki mokano+ ya kopesa mbeka ya kotumba.” 13  Na yango, Samwele alobaki na Saulo boye: “Osali likambo na bozoba.+ Otosi te mobeko+ oyo Yehova Nzambe na yo apesaki yo,+ mpo soki otosaka, Yehova alingaki kokómisa bokonzi na yo makasi na Yisraele mpo na ntango oyo etyami ndelo te. 14  Kasi sikoyo bokonzi na yo ekoumela te.+ Ya solo, Yehova akozwa moto moko oyo azali kosepelisa motema na ye;+ mpe Yehova akotya ye mokambi+ ya bato na ye, mpamba te yo otosi te mitindo oyo Yehova apesaki yo.”+ 15  Na nsima, Samwele atɛlɛmaki mpe asimbaki nzela, alongwe na Gilgale mpe amataki na Gibea ya Benyamina, mpe Saulo atángaki bato ya etumba, baoyo batikalaki elongo na ye: mibali soki nkama motoba (600).+ 16  Bongo Saulo ná mwana na ye Yonatane mpe bato ya etumba oyo batikalaki na bango bazalaki kofanda na Geba+ ya Benyamina. Nzokande Bafilistia batyaki kaa na Mikemashe.+ 17  Mpe limpinga ya bapunzi ezalaki kobima na kaa ya Bafilistia na bituluku misato.+ Etuluku moko ezalaki kolanda balabala oyo ekei na Ofra,+ tii na mokili ya Shuale, 18  mpe etuluku mosusu ezalaki kolanda balabala ya Bete-horone,+ mpe etuluku ya misato ezalaki kolanda balabala oyo ekei na ndelo oyo ezali na ngámbo ya lobwaku ya Zeboime, na ngámbo ya esobe. 19  Nzokande, motuli moko te azalaki na mokili mobimba ya Yisraele, mpamba te Bafilistia balobaki ete: “Noki Baebre básala mopanga to likɔnga.”+ 20  Mpe Bayisraele nyonso bazalaki kokita epai ya Bafilistia mpo bápelisela moto na moto ebende na ye ya kotimola mabele, to pikasi na ye, to sóka na ye, to likwangola na ye.+ 21  Mpe ntalo ya kopelisa ezalaki pimi moko mpo na bibende ya kotimola mabele mpe mpo na bapikasi mpe mpo na nkanya ya mino misato, mpo na basóka mpe mpo na kokangisa nsɔngɛ ya lingenda ya kotambwisa ngɔmbɛ.+ 22  Mpe ezalaki kosalema boye: na mokolo ya etumba, mopanga+ te to likɔnga ezalaki te na lobɔkɔ ya moto ata moko kati na bato oyo bazalaki elongo na Saulo mpe Yonatane; kaka Saulo+ ná mwana na ye Yonatane nde bazalaki na yango. 23  Sikoyo, mwa etuluku moko ya basoda ya Bafilistia oyo bazalaka liboso+ ezalaki kobima na nzela ya lobwaku ya Mikemashe.+

Maloba na nse

Motángo ya mbula ezali te na makomi ya Ebre.