Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Samwele 11:1-15

11  Bongo Nahashe, Moamone,+ amataki mpe atyaki kaa mpo na kobundisa Yabeshe,+ na Gileade. Na yango, mibali nyonso ya Yabeshe balobaki na Nahashe boye: “Salá kondimana na biso mpo tósalela yo.”+  Na nsima Nahashe, Moamone, alobaki na bango ete: “Nakosala kondimana na bino kaka soki bondimi likambo oyo: soki bondimi natɔbɔla+ mokomoko na bino liso ya mobali, mpe natya yango mpenza ezala likambo ya nsɔni na Yisraele mobimba.”+  Bongo mikóló ya Yabeshe balobaki na ye boye: “Pesá biso ntango, mikolo nsambo, mpe tokotinda bamemi-nsango na teritware nyonso ya Yisraele mpe, soki tozwi mobikisi+ te, tokobima epai na yo.”  Na nsima, bamemi-nsango bakómaki na Gibea+ ya Saulo mpe balobaki maloba yango na matoi ya bato, mpe bato nyonso babandaki kotombola mingongo na bango mpe kolela.+  Kasi talá, Saulo azali koya na nsima ya etonga ya bangɔmbɛ, auti na esobe, mpe Saulo alobaki boye: “Bato bazali kolela boye likambo nini?” Mpe babandaki koyebisa ye maloba ya mibali ya Yabeshe.  Mpe ntango ayokaki maloba yango, elimo+ ya Nzambe ebandaki kosala kati na Saulo mpe nkanda na ye engalaki makasi.+  Na yango, azwaki bangɔmbɛ mibale ya mibali mpe akataki yango bitenibiteni mpe atindaki yango na teritware mobimba ya Yisraele,+ na lobɔkɔ ya bamemi-nsango, alobi: “Moto nyonso kati na biso oyo akobima te mpo na kolanda Saulo ná Samwele, bakosala bangɔmbɛ na ye boye!”+ Mpe nsɔmɔ+ ya Yehova+ ekwelaki bato, bongo babimaki lokola moto moko.+  Na nsima, atángaki+ bango na Bezeke, mpe bana ya Yisraele bazalaki bato nkóto nkama misato (300 000), mpe mibali ya Yuda bato nkóto ntuku misato (30 000).  Bongo balobaki na bamemi-nsango oyo bayaki ete: “Talá oyo bokoloba na bato ya Yabeshe, na Gileade: ‘Lobi bokozwa lobiko ntango moi ekongala.’”+ Na yango, bamemi-nsango bayaki mpe bayebisaki bato ya Yabeshe, mpe basepelaki. 10  Bongo bato ya Yabeshe balobaki boye: “Lobi tokobima mpe tokoya epai na bino, mpe bokosala biso ndenge nyonso oyo emonani malamu na miso na bino.”+ 11  Mpe esalemaki boye: na mokolo oyo elandaki, Saulo+ atyaki bato ya etumba na bituluku misato;+ mpe bakɔtaki na kati ya kaa yango na eleko ya kokɛngɛla ya ntɔngɔntɔngɔ+ mpe babomaki Baamone+ tii ntango moi engalaki. Ntango emonanaki ete mwa ndambo na bango batikali, bapanzaki bango mpe kati na bango, batikalaki lisusu bato mibale esika moko te.+ 12  Mpe bato bakómaki koloba na Samwele ete: “Nani yango alobaki ete: ‘Bongo Saulo azala mokonzi na biso?’+ Bóbimisa bato yango, tóboma bango.”+ 13  Kasi Saulo alobaki boye: “Moto moko te akobomama lelo,+ mpamba te lelo, Yehova amemi lobiko na Yisraele.”+ 14  Na nsima, Samwele alobaki na bato boye: “Bóya, tókende na Gilgale+ mpo tózongela lisusu likambo ya bokonzi.”+ 15  Na yango, bato nyonso ya ekólo bakendaki na Gilgale, mpe kuna, batyaki Saulo mokonzi liboso ya Yehova, na Gilgale. Na nsima, bapesaki bambeka ya boyokani kuna, liboso ya Yehova,+ mpe kuna, Saulo ná mibali nyonso ya Yisraele bakobaki kosepela makasi mpenza.+

Maloba na nse