Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia na Internet | BIBLIA - LIBONGOLI YA MOKILI YA SIKA

1 Bakonzi 17:1-24

17  Mpe Eliya+ Motishebe, moko ya bato ya Gileade,+ alobaki na Ahaba ete: “Lokola Yehova Nzambe ya Yisraele oyo natɛlɛmi* liboso na ye+ azali solo na bomoi,+ na bambula oyo, mamwɛ to mbula ekozala te,+ longola kaka na etinda ya liloba na ngai!”+  Bongo liloba+ ya Yehova eyelaki ye ete:  “Kende, longwá awa, mpe baluká na ngámbo ya ɛsti mpe omibomba+ na lobwaku ya mokɛli ya Kerite oyo ezali na ɛsti ya Yordani.  Mpe ekosalema mpenza boye: okomɛla mai ya lobwaku ya mokɛli yango,+ mpe nakopesa bayanganga+ mitindo ete epesaka yo bilei kuna.”+  Na mbala moko akendaki mpe asalaki ndenge Yehova alobaki,+ bongo akendaki mpe akómaki kofanda na lobwaku ya mokɛli ya Kerite oyo ezali na ɛsti ya Yordani.  Mpe bayanganga ezalaki komemela ye limpa ná mosuni na ntɔngɔ mpe limpa ná mosuni na mpokwa, mpe azalaki komɛla mai ya lobwaku ya mokɛli.+  Kasi esalemaki boye: nsima ya mwa mikolo, mai ya lobwaku ya mokɛli yango ekaukaki,+ mpamba te mbula makasi enɔkaki te na mabele.  Bongo liloba ya Yehova eyelaki ye ete:+  “Tɛlɛmá, kende na Zarefate+ ya Sidone, mpe fandá kuna. Talá! Nakopesa mpenza mitindo na mwasi moko, oyo mobali akufá, ete apesaka yo bilei.” 10  Na yango, atɛlɛmaki mpe akendaki na Zarefate mpe akɔtaki na porte ya engumba; mpe talá! mwasi moko, oyo mobali akufá, azalaki wana kolɔkɔta nkoni. Bongo abengaki ye mpe alobaki boye: “Nabondeli yo, yelá ngai mwa mai na mbɛki namɛla.”+ 11  Ntango abandaki kokende kozwa yango, abengaki ye lisusu mpe alobaki boye: “Nabondeli yo, yelá ngai mwa limpa+ na lobɔkɔ na yo.” 12  Bongo ye alobaki ete: “Lokola Yehova Nzambe na yo azali solo na bomoi,+ nazali na gato ya libungutulu te,+ kaka mwa+ farini na elokó ya monene mpe mwa mafuta+ na elokó ya moke; mpe talá nazali kolɔkɔta mwa nkoni, nakokende mpe nakosala mwa eloko mpo na ngai ná mwana na ngai ya mobali; tokolya yango mpe tokokufa.”+ 13  Bongo Eliya alobaki na ye boye: “Kobanga te.+ Kende, salá ndenge olobi. Kasi na oyo ezali wana, salelá ngai naino mwa gato ya libungutulu,+ mpe memelá ngai yango, bongo na nsima, okoki kosala mwa eloko mpo na yo ná mwana na yo. 14  Mpo talá oyo Yehova Nzambe ya Yisraele alobi: ‘Farini ya elokó ya monene ekosila te, mpe mafuta ya elokó ya moke ekozanga te tii mokolo oyo Yehova akopesa mbula makasi na mabele.’”+ 15  Bongo akendaki mpe asalaki ndenge Eliya alobaki; mpe alyaki, ye ná Eliya mpe bato ya ndako na ye, mikolo mingi.+ 16  Farini ya elokó ya monene esilaki te, mpe mafuta ya elokó ya moke ezangaki te,+ na kolanda liloba oyo Yehova alobaki na nzela ya Eliya. 17  Mpe esalemaki boye: nsima ya makambo oyo, mwana ya mwasi yango, nkolo ndako, abɛlaki, mpe maladi na ye ekómaki makasi kino atikalaki lisusu na mpema te.+ 18  Na yango, alobaki na Eliya boye: “Ngai na yo likambo nini,+ Ee moto ya Nzambe ya solo? Oyei epai na ngai nde kokundolela ngai libunga na ngai+ mpe koboma mwana na ngai.” 19  Kasi Eliya alobaki na ye boye: “Pesá ngai mwana na yo.” Na nsima, azwaki ye na ntolo ya mwasi yango mpe amemaki ye na shambrɛ ya likoló,+ esika azalaki kofanda mpe alalisaki ye na mbeto na ye.+ 20  Mpe abandaki kobelela Yehova mpe koloba ete: “Ee Yehova Nzambe na ngai,+ opesa lisusu mpasi na mwasi oyo mobali akufá, esika nazali kofanda mopaya, na kobomáká mwana na ye?” 21  Bongo amitandaki likoló ya mwana yango+ mbala misato mpe abelelaki Yehova mpe alobaki boye: “Ee Yehova Nzambe na ngai, nabondeli yo, salá ete molimo+ ya mwana oyo ezonga kati na ye.” 22  Nsukansuka, Yehova ayokaki mongongo+ ya Eliya, bongo molimo ya mwana ezongaki kati na ye mpe azongaki na bomoi.+ 23  Sikoyo Eliya azwaki mwana mpe akitisaki ye longwa na shambrɛ ya likoló tii na ndako mpe apesaki ye na mama na ye; mpe na nsima, Eliya alobaki boye: “Talá, mwana na yo azali na bomoi.”+ 24  Na yango, mwasi wana alobaki na Eliya ete: “Sikoyo, ya solo, nayebi ete ozali moto ya Nzambe+ mpe ete liloba ya Yehova oyo ezali na monɔkɔ na yo ezali solo.”+

Maloba na nse

To, “oyo nazali kosalela.”