Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Octobre 2015

 ELOBELI TITRE YA EZIPELI | KOBONDELA EZALI MPENZA NA NTINA?

Ezali na moto moko oyo ayokaka mabondeli?

Ezali na moto moko oyo ayokaka mabondeli?

Bato mosusu bamonaka ete kobondela ezali kobebisa ntango mpo ezali te na moto moko oyo ayokaka mabondeli. Bamosusu bameká kobondela kasi bamoná ete bazwá eyano te. Mpo na komonisa ete Nzambe azalaka te, moto moko oyo andimaka te ete Nzambe azalaka, abondelaki boye: “Meká ata koloba na ngai na litoi.” Kasi alobaki ete Nzambe alobaki ata “liloba moko te.”

Kasi, Biblia emonisi ete ezali na moto moko oyo ayokaka mabondeli. Moto yango ezali Nzambe, oyo aleki bikelamu nyonso na likoló mpe na mabele. Biblia ezali na maloba oyo Nzambe alobaki mpo na bato ya ntango ya kala: “Ye [Nzambe] akozanga te komonisela yo boboto ntango lokito ya koganga na yo ekoyokana, ntango kaka akoyoka yango, akoyanola yo mpenza.” (Yisaya 30:19) Vɛrsɛ mosusu ya Biblia elobi boye: “Libondeli ya bato ya kolongobana esepelisaka ye.”​—Masese 15:8.

Yesu abondelaki Tata na ye, “mpe [Tata] ayokaki ye.”​—Baebre 5:7

Biblia elobeli mpe bandakisa ya bato oyo Nzambe ayokaki mabondeli na bango. Vɛrsɛ moko elobi ete Yesu “asɛngaki Oyo azalaki na likoki ya kobikisa ye na liwa, na koganga makasi mpe na mpisoli, mpe ayokaki ye.” (Baebre 5:7) Tokoki kokuta bandakisa mosusu na Danyele 9:21 mpe 2 Ntango 7:1.

Kasi, mpo na nini bato mosusu bamonaka ete Nzambe ayokaka mabondeli na bango te? Mpo mabondeli na biso eyokana, tosengeli kobondela kaka Yehova, * Nzambe ya Biblia kasi nzambe mosusu to bankɔkɔ te. Nzambe asɛngaka mpe ete ‘tósɛnga na boyokani na mokano na ye;’ elingi koloba makambo oyo andimaka. Nzambe alaki ete soki tobondeli ndenge wana, “akoyoka biso.” (1 Yoane 5:14) Boye, mpo Nzambe ayoka mabondeli na biso, esengeli tóyekola koyeba Nzambe ya Biblia mpe mokano na ye.

Bato mingi bamonaka ete libondeli ezali kaka te momeseno moko boye ya losambo, kasi Nzambe ayokaka mpenza mabondeli mpe ayanolaka yango. Isaac, oyo afandaka na Kenya, alobi boye: “Nabondelaki Nzambe asalisa ngai nayeba Biblia. Eumelaki te, moto moko ayaki epai na ngai mpe asɛngaki ayekola na ngai Biblia.” Na ekólo Philippines, Hilda azalaki na mposa ya kotika komɛla makaya. Nsima ya kokwea mbala na mbala na motambo yango, mobali na ye ayebisaki ye boye: “Mpo na nini te obondela Nzambe asalisa yo?” Asalelaki toli yango mpe alobi boye: “Nakamwaki ndenge Nzambe asalisaki ngai. Ezalaki lokola nde mposa na ngai ya komɛla makaya ekómaki kosila mokemoke mpe natikaki komɛla yango.”

Nzambe akoki mpe kosalisa yo na makambo oyo etungisaka yo, oyo eyokani na mokano na ye?

^ par. 6 Yehova ezali nkombo ya Nzambe na Biblia.