Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Avril 2015

 ELOBELI TITRE YA EZIPELI | OKOSEPELA KOYEKOLA BIBLIA?

Mpo na nini koyekola Biblia?

Mpo na nini koyekola Biblia?
  • Ntina ya bomoi ezali nini?

  • Mpo na nini bato banyokwamaka mpe bakufaka?

  • Bomoi ya bato ekozala ndenge nini na avenire?

  • Nzambe akipaka ngai mpenza?

Omituná naino te mituna lokola oyo wana? Soki ɛɛ, ozali yo moko te. Na mokili mobimba, bato mingi bamitunaka mituna minene etali bomoi. Biyano na mituna yango ezali?

Bamilio ya bato bakoloba, “Ɛɛ!” Mpo na nini? Mpo bazwá biyano ya malamu na mituna na bango na Biblia. Okosepela koyeba oyo Biblia elobi? Boye, okoki kozwa matomba na programɛ ya koyekola Biblia ofele elongo na Batatoli ya Yehova. *

Soki basɛngi bango báyekola Biblia, bato mosusu balobaka boye: “Nazali na makambo mingi ya kosala.” “Ezali mpasi mingi.” “Naboyi komitya nsinga na nkingo.” Kasi bamosusu balobaka bongo te. Bandimaka koyekola Biblia mpo na koyeba oyo yango eteyaka. Tózwa mwa bandakisa:

  • “Nakɔtá Lingomba ya Katolike, ya Protesta, tempelo Sikh, monastɛrɛ ya Buda mpe nayekolaki teoloji na iniversite. Kasi, nazwaki biyano te na mituna mingi oyo nazalaki komituna mpo na Nzambe. Na nsima, Motatoli ya Yehova moko ayaki na ndako na ngai. Nakamwaki ndenge azalaki koyanola mituna na ngai na Biblia, yango wana nandimaki koyekola Biblia.”​—Gill, Angleterre.

  • “Nazalaki na mituna mingi etali bomoi, kasi biyano oyo pastɛrɛ apesaki ngai esepelisaki ngai te. Kasi, Motatoli ya Yehova moko asalelaki Biblia mpo na koyanola na mituna na ngai. Ntango atunaki ngai soki nakosepela koyeba makambo mosusu, nandimaki na esengo nyonso.”​—Koffi, Bénin.

  • “Nalingaki koyeba ndenge moto akómaka soki akufi. Nazalaki kondima ete bato oyo bakufá bakoki kosala bato ya bomoi mabe, kasi nalingaki koyeba oyo Biblia elobaka. Yango wana, nakómaki koyekola Biblia ná moninga moko oyo azalaki Motatoli ya Yehova.”​—José, Brésil.

  • “Namekaki kotánga Biblia kasi nakangaki ntina na yango te. Na nsima, Batatoli ya Yehova bayaki epai na ngai mpe balimbolelaki ngai bisakweli mingi ya Biblia. Nalukaki mpe koyeba makambo mosusu.”​—Dennize, Mexique.

  • “Nazalaki komituna soki Nzambe akipaka ngai mpenza. Yango wana, nazwaki ekateli ya kobondela Nzambe ya Biblia. Mokolo oyo elandaki, Batatoli ya Yehova bayaki na ndako na ngai mpe nandimaki koyekola Biblia.”​—Anju, Népal.

Makambo nyonso oyo bato yango balobi etindi biso tókanisa maloba ya Yesu oyo: “Esengo na baoyo bayebi bobola na bango ya elimo.” (Matai 5:3) Ya solo, Nzambe asalá bato na mposa ya koyeba ye. Kaka Nzambe nde akoki kokokisa mposa yango mpe asalaka yango na nzela ya Liloba na ye, Biblia.

Koyekola Biblia esɛngaka nini? Ndenge nini okoki kozwela yango litomba? Lisolo oyo elandi ekopesa biyano na mituna yango.

^ par. 8 Yehova ezali nkombo ya Nzambe na Biblia.