Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Mars 2015

Biyano na mituna ya Biblia

Biyano na mituna ya Biblia

Mpo na nini tosengeli kokanisaka liwa ya Yesu?

Liwa ya Yesu epesi bato elikya nini mpo na mikolo ezali koya?​—Yisaya 25:8; 33:24

Banda kala, liwa ya Yesu ezalaka likambo oyo eleki ntina; akufaki mpo bato bázongela bomoi oyo Nzambe akanaki mpo na bango na ebandeli. Bato bakelamaki te mpo básalaka makambo mabe, bábɛlaka to bákufaka. (Ebandeli 1:31) Kasi lisumu ekɔtaki na mokili mpo na moto ya liboso, Adama. Yesu apesaki bomoi na ye mpo na kobikisa biso na lisumu mpe na liwa.​—Tángá Matai 20:28; Baroma 6:23.

Nzambe amonisaki mpenza ete alingaka biso na ndenge atindaki Mwana na ye na mabele mpo akufa mpo na biso. (1 Yoane 4:9, 10) Yesu ayebisaki bayekoli na ye básalaka mwa molulu oyo esɛngaki básalela limpa ná vinyo mpo na kokanisaka liwa na ye. Kosala bongo mbula nyonso ezali lolenge moko ya komonisa botɔndi na bolingo oyo Nzambe mpe Yesu bamoniselaki biso.​—Tángá Luka 22:19, 20.

Banani basengeli kolya limpa mpe komɛla vinyo?

Mbala ya liboso oyo Yesu ayebisaki bayekoli na ye bákanisaka liwa na ye, alobelaki kondimana to kɔntra. (Matai 26:26-28) Efungolelaki bango mpe mwa ndambo ya bato mosusu nzela ya kokóma bakonzi mpe banganga-nzambe elongo na Yesu na likoló. Atako bamilio ya bato bakanisaka liwa ya Yesu, kaka baoyo bazali na kondimana wana nde balyaka limpa mpe bamɛlaka vinyo.​—Tángá Emoniseli 5:10.

Ekokisi sikoyo mbula pene na 2 000 banda Yehova aponaka baoyo bakozala bakonzi. (Luka 12:32) Motángo na bango ezali moke soki tokokanisi yango na oyo ya bato oyo bakozwa bomoi ya seko na mabele.​—Tángá Emoniseli 7:4, 9, 17.