Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Décembre 2014

 ELOBELI TITRE YA EZIPELI | OKOKI KOPUSANA PENEPENE NA NZAMBE

Osololaka na Nzambe?

Osololaka na Nzambe?

Baninga ya motema basololaka mbala nyonso oyo libaku epesameli bango na telefone, na Internet, na video, na mikanda to soki bakutani. Ndenge moko mpe, soki tolingi kopusana penepene na Nzambe, tosengeli kosololaka na ye mbala na mbala. Kasi, ndenge nini tokoki kosala yango?

Tokoki kosolola na Yehova na nzela ya libondeli. Kasi, tosengeli te kobondela Nzambe ndenge tosololaka na moninga moko boye. Ntango tozali kobondela, tosengeli koyeba ete tozali koloba na Mozalisi na biso, oyo aleki Molɔ́ngɔ́ mobimba. Yango ekotinda biso tóbondela na limemya makasi. Mpo Nzambe andima mabondeli na biso, tosengeli mpe kokokisa makambo mosusu. Na ndakisa, makambo misato oyo elandi:

Ya liboso, tosengeli kobondela kaka Yehova ye moko, kasi te Yesu, “santu” to ekeko. (Kobima 20:4, 5) Biblia elobi polele ete: “Na makambo nyonso na libondeli mpe na lilɔmbɔ ná matɔndi, kosɛnga na bino eyebana epai ya Nzambe.” (Bafilipi 4:6) Ya mibale, tosengeli kobondela Nzambe na nkombo ya Mwana na ye, Yesu Kristo. Yesu ye moko alobaki boye: “Moto moko te azali koya epai ya Tata soki na nzela na ngai te.” (Yoane 14:6) Ya misato, mabondeli na biso esengeli koyokana na mokano ya Nzambe. Biblia elobi boye: “Ezala eloko nini biso tokosɛnga na boyokani na mokano na ye, akoyoka biso.” *1 Yoane 5:14.

Baninga ya motema balingaka ete baninga na bango bátikelaka bango mpe ntango ya koloba

Na ntembe te, soki ozali na moninga oyo alingaka kaka ye nde alobaka, boninga yango ekoumela te. Kaka ndenge baninga balingaka ete baninga na bango bátikelaka bango mpe ntango ya koloba, biso mpe tosengeli koyoka Nzambe ntango azali koloba na biso. Oyebi ndenge Nzambe alobaka na biso?

Lelo oyo, Yehova Nzambe “alobaka” na biso na nzela ya Liloba na ye, Biblia. (2 Timote 3:16, 17) Mpo na nini tolobi bongo? Tózwa ndakisa: Kanisá ete moninga na yo moko ya motema atindeli yo mokanda. Nsima ya kotánga yango, na esengo nyonso okoyebisa bato mosusu ete: “Moninga na ngai auti koyebisa ngai makambo!” Kasi, bokutanaki te mpo bósolola, akomelaki yo nde mokanda. Ndenge moko mpe, ntango ozali kotánga Biblia, ozali kotika Yehova aloba na yo. Na yango, Gina oyo tolobelaki na ebandeli ya lisolo oyo, alobi boye: “Nakanisi ete soki nalingi Nzambe azwa ngai lokola moninga, nasengeli kotángaka Biblia, ‘mokanda’ na ye oyo atindelá biso.” Abakisi boye: “Kotánga Biblia mokolo na mokolo ekómisaka ngai penepene na Nzambe.” Otángaka Biblia, Liloba ya Nzambe mokolo na mokolo mpo na kotika ye alobaka na yo mikolo nyonso? Kosala bongo ekosalisa yo omiyoka ete ozali penepene na Nzambe.

^ par. 5 Mpo na koyeba makambo mosusu oyo etali kopusana penepene na Nzambe na nzela ya libondeli, talá mokapo 17 ya buku Biblia eteyaka mpenza nini? ebimisami na Batatoli ya Yehova.

Makambo mosusu

BIYANO NA MITUNA YA BIBLIA

Nzambe akosalisa ngai soki nabondeli ye?

Nzambe akipaka mpenza makambo na ngai?