Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Septembre 2014

Biyano na mituna ya Biblia

Biyano na mituna ya Biblia

Baanzelu bakoki kosalisa biso?

Kaka ndenge basalisaki Danyele, mosaleli ya sembo ya Nzambe na ntango ya kala, lelo oyo baanzelu basalisaka bato bázwela nsango malamu litomba

Yehova Nzambe akelaki bamilio ya baanzelu bambula mingi liboso akela bato. (Yobo 38:4, 7) Baanzelu yango bazali bikelamu ya elimo ya nguya oyo basalaka mosala ya Nzambe, na bantango mosusu atindaka bango mpo na kokamba mpe kobatela basaleli na ye awa na mabele. (Nzembo 91:10, 11) Lelo oyo, baanzelu bazali kosalisa bato bázwa matomba na nsango malamu oyo bayekoli ya Yesu basakolaka.​—Tángá Emoniseli 14:6, 7.

Tosengeli nde kobondela baanzelu mpo na kosɛnga lisungi? Te. Libondeli ezali moko ya makambo ya losambo oyo kaka Nzambe nde abongi kozwa yango. (Emoniseli 19:10) Lokola baanzelu bazali basaleli ya Nzambe, balandaka mibeko ya Nzambe kasi ya bato te. Yango wana, tosengeli ntango nyonso kobondela kaka Nzambe na nzela ya Yesu.​—Tángá Nzembo 103:20, 21; Matai 26:53.

Baanzelu ya mabe bazalaka?

Nzambe akelá baanzelu na bonsomi ya kopona lokola bato mpe bakoki kopona kosala malamu to mabe. Likambo ya mawa, baanzelu mingi batombokelá Nzambe. (2 Petro 2:4) Anzelu ya liboso na kati na bango ezali Satana; baanzelu mosusu mpe balandaki ye mpe bakómá bademo. Na bambula oyo eleká, Satana ná bademo na ye babwakamaki awa na mabele.​—Tángá Emoniseli 12:7-9.

Ndenge makambo mabe mpe mobulu ezali se kobakisama banda 1914 emonisi ete kala mingi te, Nzambe akosukisa misala ya Satana ná bademo na ye. Na nsima, Nzambe akozongisa mabele paradiso.​—Tángá Emoniseli 12:12; 21:3, 4.