Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  Sanza ya Juillet 2014

 ELOBELI TITRE YA EZIPELI | MPO NA NINI MAKAMBO MABE EKÓMELAKA BATO MALAMU?

Oyo Nzambe akosala mpo na makambo mabe

Oyo Nzambe akosala mpo na makambo mabe

Biblia eyebisi biso polele makambo oyo Yehova mpe Mwana na ye, Yesu Kristo bakosala mpo na bampasi oyo Satana Zabolo abimisá. Biblia elobi boye: “Ezali mpo na ntina oyo nde Mwana ya Nzambe [Yesu] amonisamaki polele, elingi koloba, mpo na kobukabuka misala ya Zabolo.” (1 Yoane 3:8) Mokili oyo etondi na lokoso, koyina mpe makambo mabe ekolimwa. Yesu alaki ete Satana Zabolo “mokonzi ya mokili oyo akobwakama libándá.” (Yoane 12:31) Mokili ya sika ya sembo oyo Nzambe akotya ekozala esika moko ya kimya mpo Satana akozala te.​—2 Petro 3:13.

Bongo baoyo bazali koboya na nko nyonso kobongola bomoi na bango mpe bazali kokoba kosala mabe? Tótalela elikya oyo ya polele: “Bato ya kolongobana nde bakofanda na mabele, mpe bato oyo bazangi mbeba nde bakotikala na yango. Kasi bato mabe bakolongolama na mabele; mpe bato ya bokosi bakopikolama wana.” (Masese 2:21, 22) Bato mabe bakozala lisusu te mpo na kobimisa mobulu. Lokola kimya ekozala ndenge wana, mokemoke bato ya botosi bakozonga bato ya kokoka.​—Baroma 6:17, 18; 8:21.

Na mokili yango ya sika, ndenge nini Nzambe akosilisa mabe? Akolongola te bonsomi ya kopona oyo apesá biso mpo akómisa biso barobo. Kutu, akoteya bato ya botosi banzela na ye, akosalisa bango bátika makanisi mpe misala mabe.

Nzambe akolongola makambo nyonso oyo ebimiselaka bato bampasi

Nzambe akosala nini mpo na makama oyo ebimelaka bato na mbalakaka? Alaki ete mosika te, Bokonzi na ye ekoyangela mabele. Mokonzi ya Bokonzi yango oyo Nzambe atye ezali Yesu Kristo, oyo azali na nguya ya kobikisa maladi. (Matai 14:14) Yesu azali mpe na bokonzi likoló ya biloko lokola mopɛpɛ, mai mpe mɔtɔ. (Marko 4:35-41) Lisusu, bampasi oyo ebimaka mpo na “ntango ná makambo oyo ekanami te,” ekozala lisusu te. (Mosakoli 9:11) Ntango Kristo akoyangela, likama moko te ekokómela bato.​—Masese 1:33.

Bongo bamilio ya bato oyo basalaki eloko te, oyo bakufaki na liwa ya nsɔmɔ? Mwa moke liboso asekwisa moninga na ye Lazare, Yesu alobaki boye: “Nazali lisekwa mpe bomoi.” (Yoane 11:25) Ya solo, Yesu azali na nguya ya kosekwisa, to ya kozongisa bakufi na bomoi!

Soki likanisi ya kozala na mokili oyo makambo nyonso ya mabe ekokómela lisusu bato ya malamu te esepelisi yo, mpo na nini te kozwa mokano ya koyekola Biblia mpo na koyeba makambo mingi oyo etali Nzambe ya solo mpe mokano na ye? Batatoli ya Yehova na esika ofandi bakosepela kosalisa yo ozwa boyebi yango. Tosɛngi yo na esengo nyonso okutana na bango na esika ofandi to komelá babimisi ya zulunalo oyo.