Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli  |  No 2 2017

 LISOLO YA TITRE YA EZIPELI | OKONDIMA LIKABO YA NZAMBE OYO ELEKI MAKABO NYONSO?

Likabo oyo ekeseni na makabo mosusu nyonso

Likabo oyo ekeseni na makabo mosusu nyonso

JORDAN asimbi eloko ya kosebisa krɛyo oyo ezali lokola masuwa; eloko yango ezali komonana lokola ezangi ntina, kasi ezali moko ya biloko na ye ya valɛrɛ. Jordan alobi boye: “Russel, moninga moko ya libota, oyo azalaki mokóló nde apesaki ngai yango ntango nazalaki elenge mpenza.” Nsima ya liwa ya Russell, Jordan ayaki koyeba ete Russell asalisaká nkɔkɔ mpe baboti na ye, alendisaká bango na ntango ya mpasi. Jordan abakisi: “Sikoyo lokola nayebi makambo mingi etali Russell, mwa likabo oyo ekómá na valɛrɛ mingi na miso na ngai.”

Ndenge ndakisa ya Jordan emonisi yango, likabo ekoki kozala na valɛrɛ to te na miso ya bato mosusu. Kasi, epai ya moto oyo azwi mpe asepeli na yango, ekoki kozala na valɛrɛ mingi mpenza. Biblia elobeli likabo oyo ezali na valɛrɛ mingi koleka na maloba oyo bato mingi bayebi: “Nzambe alingaki mokili mingi, yango wana apesaki Mwana na ye se moko oyo abotamaki, mpo moto nyonso oyo azali kondimela ye abomama te kasi azwa bomoi ya seko.”Yoane 3:16.

Likabo yango ekoki kopesa bomoi ya seko epai ya baoyo bazali kondima yango! Ezali nde na likabo mosusu oyo eleki yango na valɛrɛ? Bakristo ya solo bazwaka yango na “motuya,” atako bato mosusu bayebaka valɛrɛ na yango te. (Nzembo 49:8; 1 Petro 1:18, 19) Kasi, mpo na nini Nzambe apesaki bomoi ya Mwana na ye lokola likabo mpo na mokili?

Ntoma Paulo alimboli yango na maloba oyo: “Lisumu ekɔtaki na mokili mpo na moto moko mpe liwa mpo na lisumu, ndenge moko mpe liwa epalangani epai ya bato nyonso.” (Baroma 5:12) Adama moto ya liboso asalaki lisumu ndenge aboyaki na nko nyonso kotosa Nzambe, yango wana bakatelaki ye etumbu ya liwa. Liwa ekɔtelá bato nyonso mpo na Adama.

 “Lifuti oyo lisumu ezali kofuta ezali liwa, kasi likabo oyo Nzambe azali kopesa ezali bomoi ya seko na nzela ya Kristo Yesu Nkolo na biso.” (Baroma 6:23) Mpo na kolongola bato na etumbu ya liwa, Nzambe atindaki Mwana na ye Yesu Kristo na mokili akaba bomoi na ye ya kokoka. Na nzela ya mbeka yango oyo ebengamaka “lisiko,” bato nyonso oyo bamonisaka kondima epai ya Yesu bakozwa bomoi ya seko.Baroma 3:24.

Mpo na mapamboli nyonso oyo Nzambe apesi basambeli na ye na nzela ya Yesu Kristo, Paulo alobi boye: “Nzambe azwa matɔndi mpo na likabo na ye wana ya ofele.” (2 Bakorinti 9:15) Kutu, tozangi maloba mpo na komonisa valɛrɛ oyo Lisiko ezali na yango. Kasi, na makabo nyonso oyo Nzambe apesá bato, mpo na nini lisiko nde eleki mpenza? Ndenge nini ekeseni na makabo mosusu nyonso? * Mpe ndenge nini tokoki komonisa botɔndi mpo na yango? Tosɛngi yo otánga biyano ya Biblia na mituna yango na masolo mibale oyo elandi.

^ par. 8 Yesu “akabaki molimo na ye mpo na biso” na bolingo na ye moko. (1 Yoane 3:16) Kasi, lokola mbeka yango ezalaki na kati ya mokano ya Nzambe, masolo oyo elobeli mingi mokumba ya Nzambe ndenge apesaki lisiko.