Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Linɔ́ngi ya Mosɛnzɛli—Nimero ya boyekoli  |  Sanza ya Août 2017

Mituna ya batángi

Mituna ya batángi

Mpo na nini lisolo ya bomwana ya Yesu na mokanda ya Matai ekeseni na oyo ya mokanda ya Luka?

Lisolo ya Matai oyo elobeli kobotama mpe bomwana ya Yesu ekeseni na oyo ya Luka mpo Matai alobeli makanisi mpe bomoi ya moto mosusu, Luka mpe alobeli ya moto mosusu.

Matai alobeli mingi makambo oyo etali Yozefe. Alobeli likambo oyo Yozefe akanaki kosala ntango ayebaki ete Maria azali na zemi, ndenge anzelu abimelaki ye na ndɔtɔ mpo na koyebisa ye ntina ya zemi yango, mpe ndenge alandaki malako ya anzelu. (Matai 1:19-25) Matai alobeli mpe ndenge anzelu akebisaki Yozefe na ndɔtɔ ete akimisa libota na ye na Ezipito, mpe ndenge atosaki. Na nsima, Matai alobi ete Yozefe alɔtaki ndɔtɔ mosusu epai anzelu moko ayebisaki ye azonga na mokili ya Yisraele, mpe ete azongaki mpe akendaki kofanda na Nazarete elongo na libota na ye. (Matai 2:13, 14, 19-23) Na mikapo mibale ya liboso ya Evanzile na ye, Matai atángi nkombo ya Yozefe mbala mwambe, nkombo ya Maria mbala minei mpamba.

Nzokande, Luka alobeli mingi nde Maria. Alobeli koya ya anzelu Gabriele epai ya Maria, ndenge Maria akendaki kotala ndeko na ye Elizabeti, mpe ndenge akumisaki Yehova. (Luka 1:26-56) Alobeli mpe makambo oyo Simeone ayebisaki Maria mpo na ndenge Yesu akonyokwama. Luka alobeli mpe ntango Yesu akendaki na tempelo elongo na libota na ye ntango azalaki na mbula 12. Ata na lisolo yango, Luka azongeli kaka maloba ya Maria, kasi ya Yozefe te, mpe alobi ete Maria amitungisaki mingi mpo na makambo oyo elekaki kuna. (Luka 2:19, 34, 35, 48, 51) Na mikapo mibale ya liboso ya Evanzile na ye, Luka atángi nkombo ya Maria mbala 12, kasi ya Yozefe mbala misato mpamba. Na yango, Matai alobeli mingi makanisi mpe bomoi ya Yozefe. Luka abendi likebi mingi na makanisi mpe bomoi ya Maria.

Baevanzile yango elobeli libota mpe molɔngɔ ya bankɔkɔ ya Yesu na ndenge ekeseni. Matai atángi molɔngɔ ya bankɔkɔ ya Yozefe mpe amonisi ete Yesu, mwana oyo Yozefe abɔkɔlaki, azwaki lotomo na kolanda mibeko ya kofanda na kiti ya bokonzi ya Davidi. Mpo na nini? Mpo Yozefe azalaki mokitani ya Mokonzi Davidi na nzela ya Salomo mwana na ye. (Matai 1:6, 16) Kasi, Luka atángi molɔngɔ ya bankɔkɔ ya Maria mpe amonisi ete Yesu abotamaki na lotomo ya kofanda na kiti ya bokonzi ya Davidi mpo Davidi azalaki nkɔkɔ na ye. (Baroma 1:3) Mpo na nini? Mpo Maria azalaki mokitani ya Mokonzi Davidi na nzela ya mwana na ye Natane. (Luka 3:31) Kasi mpo na nini Luka atángi Maria te lokola mwana mwasi ya Heli, tata na ye? Mpo mbala mingi na mikanda ya Leta, bazalaki kaka kokoma nkombo ya bana mibali ya libota. Yango wana, ntango Luka atángi Yozefe mpe alobi ete azali mwana ya Heli, bato bayebaki ete azali nde bokilo na ye.​—Luka 3:23.

Ndenge Evanzile ya Matai mpe ya Luka etángi molɔngɔ ya bankɔkɔ ya Yesu emonisi ete Yesu azalaki mpenza Masiya oyo Nzambe alakaki. Bato bayebaki malamu ete Yesu azalaki mokitani ya Mokonzi Davidi; kutu ata Bafarisai ná Basadukai batyelaki yango ntembe ata mbala moko te. Ndenge Matai ná Luka balobeli molɔngɔ ya bankɔkɔ ya Yesu ezali kokómisa kondima na biso makasi mpe kondimisa biso ete bilaka ya Nzambe oyo tozali kozela ekokokisama mpenza.