Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Lamuká!  |  No 6 2016

 BIBLIA ELOBI NINI

Kotosa ngonga

Kotosa ngonga

Ata bato oyo bakómaka ntango nyonso na retare bandimaka ete kotosa ngonga ezali malamu. Biblia epesi toli oyo ebongi na likambo yango.

Kotosa ngonga ezali na ntina nini?

MPO NA NINI EZALI NA NTINA?

Bato mingi bamoni ete kokóma mwa moke liboso ya ngonga na esika boyokanaki esalaka ete moto amitungisa mingi te. Kotosa ngonga ebakisaka mpe lokumu ya moto. Na ndenge nini?

Kotosa ngonga emonisaka ete moto azali na likoki ya kosala likambo oyo akosala. Soki ozali kotosa ngonga, ekomonisa ete oyebi kotambwisa bomoi na yo, kasi otiki te ete makambo mosusu epekisa yo kaka mpamba kosala makambo oyo olingi kosala.

Kotosa ngonga emonisaka ete ozali moto ya kotyela motema. Mbala mingi bato batosaka te bilaka mpe makambo oyo bayokanaki, yango wana basepelaka mingi na baoyo batosaka maloba na bango. Bandeko ya libota mpe baninga bamemyaka mingi bato oyo babongi kotyelama motema. Bapatrɔ balingaka mingi basali oyo bakómaka na ngonga na mosala mpe basilisaka mosala na ngonga. Basali ya malamu bafutamaka malamu mpe batyelaka bango motema mingi mpenza.

OYO BIBLIA ELOBI

Ezali na bavɛrsɛ ya Biblia oyo elobeli kotosa ngonga. Na ndakisa, Biblia elobi: “Makambo nyonso esalema na ndenge ya lokumu mpe na molɔngɔ.” (1 Bakorinti 14:40) Ntango bato mibale bayokani ete bákutana na esika moko boye na ngonga moko boye, ekozala malamu bátosa ngonga. Biblia elobi mpe ete: “Eloko nyonso ezali na ntango na yango, ɛɛ likambo na likambo na ntango na yango na nse ya lola.” (Mosakoli 3:1) Vɛrsɛ oyo elandi emonisi ete ezali na “ntango ya kolona mpe ntango ya kopikola eloko oyo elonamaki.” (Mosakoli 3:2) Basali-bilanga balonaka na ntango ya malamu, na ngonga, mpo bilanga na bango ebota malamu mpenza. Na maloba mosusu, lokola basali-bilanga balonaka na ngonga oyo ebongi, babukaka mbuma mingi.

Biblia epesi ntina mosusu ya malamu mpenza ya kotosaka ngonga: Emonisaka ete omemyaka basusu mpe omonaka ete ngonga na bango ezali na ntina mingi. (Bafilipi 2:3, 4) Nzokande, baoyo bakómaka ntango nyonso na retare mpo bázelaka bango, bayibaka nde ngonga ya baninga.

“Bótyaka likebi kaka na makambo na bino moko te, kasi bótyaka mpe likebi na makambo ya bamosusu.”Bafilipi 2:4.

 Osengeli kosala nini mpo otosaka ngonga?

OYO BIBLIA ELOBI

Biblia elendisaka biso tóbongisaka makambo liboso. (Masese 21:5) Soki omoni ete okómaka ntango nyonso na retare, emonisi ntango mosusu ete ozalaka na makambo mingi ya kosala. Na yango, longolá makambo oyo ezangi ntina oyo elyaka yo ngonga. Soki okokende bisika mibale, tiká ngonga mingi na kati mpe salá nyonso okóma liboso ya ngonga. Yango ekosala ete makambo oyo ekanami te, na ndakisa mituka ebele oyo ekangi nzela to mpe mbula etya yo mobulu te.

Biblia elendisaka biso mpe tóyebaka esika makoki na biso esuki. (Masese 11:2) Elingi koloba, tóyeba oyo tokoki kosala mpe oyo tokoki kosala te. Talá malamumalamu soki okokende na esika moko boye to okosilisa mosala moko boye na ngonga oyo esengeli liboso ete ondima yango. Soki okani kosala makambo mingi koleka oyo okoki kosala, ekotungisa mpe ekolɛmbisa yo, mpe ekosala bato mosusu kaka bongo!

Biblia elendisi biso ete tósalelaka ntango na biso malamu. (Baefese 5:15, 16) Tyá makambo oyo eleki ntina na esika ya liboso. (Bafilipi 1:10) Na ndakisa, soki ozali kozela motuka ya bato ebele to ozali kozela moto, tángá mwa eloko to bongisá makambo oyo okosala na ntango oyo etikali.

“Myango ya moto ya etingya ememaka mpenza na litomba.”Masese 21:5.