Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Lamuká!  |  Sanza ya Mai 2015

 BIBLIA ELOBI NINI?

Mobulu

Mobulu

Istware ya bato etondi na makambo ya mobulu. Makambo yango ekokoba libela na libela?

Nzambe atalelaka mobulu ndenge nini?

OYO BATO BALOBAKA

Bato mingi, ata mpe oyo basambelaka bamonaka ete ezali mabe te kosala mobulu soki batumoli yo. Mpe bamilio ya bato bamonaka ete baprogramɛ ya televizyo oyo elakisaka bafilme mpe masano ya mobulu ezali mabe te.

OYO BIBLIA ELOBI

Pene ya engumba Mossoul, na nɔrdi ya Irak, ezali na esika oyo ebebá, epai Ninive engumba monene ya ampire ya Asiri ezaláká. Ntango engumba yango ezalaká naino na bomɛngo, Biblia esakolaká ete Nzambe “akokómisa Ninive esika oyo etikali mpamba.” (Sefania 2:13) Nzambe alobaki boye: “Nakokómisa yo eloko ya kotala.” Mpo na nini? Mpo Ninive ezalaki “engumba oyo esopaka makila.” (Nahumu 1:1; 3:1, 6) Nzembo 5:6 elobi ete “Yehova ayinaka moto oyo asopaka makila.” Esika oyo ebebábebá, epai Ninive ezaláká emonisi ete Nzambe akokisaki maloba na ye.

Satana Zabolo, monguna monene ya Nzambe mpe ya bato nde abandisá mobulu mpe Yesu abengaki ye “mobomi-bato.” (Yoane 8:44) Longola yango, lokola “mokili mobimba ezali kolala na nguya ya moto mabe,” bizaleli na ye ezali komonana na ndenge oyo bato mingi batalelaka mobulu, ata mpe mposa makasi oyo bato bazalaka na yango ya kotala makambo ya mobulu oyo elekaka na batelevizyo. (1 Yoane 5:19) Mpo na kosepelisa Nzambe, tosengeli koyina mobulu mpe kolinga makambo oyo Nzambe alingaka. * Yango ekoki kosalema?

“Yehova . . . ayinaka mpenza moto oyo alingaka mobulu.”​Nzembo 11:5.

Bato ya mobulu bakoki kobongwana?

OYO BATO BALOBAKA

Mobulu ezali na kati ya bomoto ya bato, mwaye ya kobongola yango ezali te.

OYO BIBLIA ELOBI

Bólongola mosika na bino “nkɛlɛ, nkanda, mabe, maloba ya kofinga, mpe maloba ya nsɔni.” Elobi lisusu boye: “Bólongola bomoto ya kala elongo na misala na yango, mpe bólata bomoto ya sika.” (Bakolose 3:8-10) Makambo oyo Nzambe asɛngi biso eleki ndelo? Te. Bato bakoki kobongwana. * Ndenge nini?

Likambo ya liboso ya kosala ezali ya kozwa boyebi ya sikisiki ya Nzambe. (Bakolose 3:10)  Ntango moto ayekoli bizaleli kitoko ya Mozalisi mpe mibeko na ye, bolingo nde ekotinda ye apusana penepene na Nzambe mpe alinga kosepelisa ye.​—1 Yoane 5:3.

Likambo ya mibale etaleli kopona baninga. “Kosala boninga na moto moko te oyo alingá kosilika; mpe osengeli te kotambola esika moko na moto oyo atombokaka mpambampamba, mpo omesana na banzela na ye te mpe mpo okɔtisa mpenza molimo na yo na motambo te.”​—Masese 22:24, 25.

Likambo ya misato etaleli bososoli. Talelá mposa ya kolinga mobulu lokola bolɛmbu ya makasi oyo emonisaka ete moto azangi komipekisa. Kasi moto oyo atyaka kimya azalaka nde na nguya. Masese 16:32 elobi boye: “Ye oyo ayokaka nkanda noki te azali malamu koleka moto ya nguya.”

“Bólanda kozala na kimya na bato nyonso.”​Baebre 12:14.

Mobulu ekosila mokolo mosusu?

OYO BATO BALOBAKA

Mobulu ezalaka kaka mpe ekokoba kozala.

OYO BIBLIA ELOBI

“Etikali kaka mwa ntango moke, moto mabe akozala lisusu te . . . Kasi bato ya komikitisa bakozwa mabele, mpe bakosepela mpenza na kimya mingi.” (Nzembo 37:10, 11) Mpo na kobikisa bato ya komikitisa mpe oyo balukaka kimya, Nzambe akosala bato oyo balingaka mobulu ndenge asalaki bato ya Ninive. Na nsima, mobulu ekobebisa lisusu te kimya na mabele!​—Nzembo 72:7.

“Bato ya ezaleli ya boboto . . . bakozwa libula ya mabele.”​—Matai 5:5.

Na yango, sikoyo ezali ntango ya kosala nyonso mpo na kozala bato oyo balukaka kimya mpo Nzambe andima biso. 2 Petro 3:9 elobi boye: “Yehova . . . azali nde komonisela bino motema molai mpo alingi moto ata moko te abomama kasi alingi nde bato nyonso bábongola motema.”

“Bakotula mipanga na bango mpo ekóma bitimweli ya mabele mpe makɔnga na bango mpo ekóma makwangola ya kokata matiti.”​Yisaya 2:4.

^ par. 7 Nzambe atikaká Bayisraele bábunda bitumba mpo na kobatela mabele na bango. (2 Ntango 20:15, 17) Kasi, likambo yango ebongwanaki ntango Nzambe asukisaki kondimana to kɔntra oyo asalaki na Bayisraele mpe asalaki lisangá ya bokristo oyo ezangi bandelo.

^ par. 11 Bandakisa ya bato oyo babongolaki bomoi na bango ezali na masolo oyo elobi “Biblia ebongolaka bato,” na Linɔ́ngi ya Mosɛnzɛli.