Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Lamuká!  |  Sanza ya Janvier 2015

 MIKILI MPE BATO

Mobembo moko na Costa Rica

Mobembo moko na Costa Rica

ELEKI sikoyo mbula 500, bato ya Espagne bakómaki mpo na mbala ya liboso na mokili yango. Babengaki yango Costa Rica (Côte Riche) mpo bakanisaki ete bakomona wolo ebele na esika yango, kasi esalemaki bongo te. Lelo oyo, na mokili yango eyebani te lokola esika oyo mabanga ya ntalo eutaka, kasi nde esika oyo banyama mpe banzete ndenge na ndenge ezalaka.

Babengaka bato ya Costa Rica Ba-Ticos, mpo bazalaka na momeseno ya kobakisa liloba “-ico” na nsuka ya maloba mpo na kolobela moke na yango. Na ndakisa, na esika ya koloba “un momento” (zelá moke), bakoki koloba “un momentico” (zelá mwa moke). Mokolo na mokolo, basalelaka maloba “¡pura vida!” (bomoi malamu!) mpo na komonisa esengo na bango to mpo na kopesana mbote.

Bazamba ya Costa Rica etondi na banzete mpe banyama ya ndenge na ndenge, na ndakisa ligorodo ya miso motane oyo efandaka na nzete (Agalychnis callidryas)

Moko ya bilei oyo bato ya Costa Rica balingaka mingi ezali gallo pinto​—balambaka loso ná madesu mpe na nsima basangisaka yango mpe batyaka yango biloko ya nsolo kitoko. Balyaka gallo pinto na ntɔngɔ, na midi, to  na mpokwa. Bato balingaka mingi komɛla café chorreado; basalaka yango na elamba moko bakangisá na libaya.

Masangá ya Batatoli ya Yehova ezali soki 450 na Costa Rica. Basalaka makita na minɔkɔ zomi, kati na yango elobeli ya bajɛstɛ ya Costa Rica mpe minɔkɔ mibale ya mboka: Bribri mpe Cabecar.

OYEBAKI YANGO? Na Costa Rica, bamoná ebele ya mabanga kitoko ya libungutulu oyo ebongisamá malamu. Katikati ya libanga (diamètre) oyo eleki monene ezali na mɛtrɛ soki mibale ná ndambo. Bato balobaka ete mabanga yango mosusu eumeli mbula koleka 1 400. Moto moko te ayebi mpenza ntina oyo basalá mabanga yango!

Mabanga ya libungutulu