Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Lamuká!  |  Sanza ya Décembre 2014

Makambo oyo ezali koleka na mokili

Makambo oyo ezali koleka na mokili

Israël, Jordanie mpe Palestine

Mbu Ekufá ezali se kokɔnda, mɛtrɛ moko ezali kolongwa mbula nyonso. Bato mosusu bazali kobanga ete tii tókóma na 2050, laki yango ekokauka nyonso. Bakonzi bazali koluka solisyo. Moko ya makambo oyo bazali naino koyekola ezali ya kosilisa mungwa na mai ya Mbu Motane mpo bato bámɛlaka yango mpe na nsima kolekisa mai oyo esili mungwa na Mbu Ekufá. Basusu bazali kobanga ete mayele yango ebebisa bomoi ya bikelamu ndenge na ndenge oyo ezalaka na Mbu Ekufá.

Allemagne

Ankɛtɛ moko oyo kompanyi moko ya asiranse esalaki emonisi ete na mokolo ya Noele, bato mingi (1/3) oyo babɛlaka maladi ya motema bakendaka na lopitalo koleka mokolo mosusu nyonso na mbula. Kompanyi yango elobi ete bato yango bamitungisaka mingi ntango balukaka bakado ya Noele mpe mpo bato ya libota to baninga balekisaka ndelo na oyo bazelaka ete básalela bango.

Grande-Bretagne

Bato ya siansi na ekólo yango balobaki ete mbɛmbɛ moko ya Islande oyo bakanisaki ete esalaki mbula 405 na bomoi, esalaki nde mbula 507 ntango ekufaki liwa ya mbalakaka na 2006. Yango esali ete ezala nyama oyo eumeli mingi na bomoi * na banyama oyo balobelá. Bato ya mayele babomaki mbɛmbɛ yango ntango batyaki yango na malili mpo na komema yango na laboratware na bango.

Amérique latine mpe Caraïbes

Na likita oyo esalemaki na Havane, mboka-mokonzi ya ekólo Cuba, na ebandeli ya mbula oyo, bikólo 33 ya mokili ya Amérique Latine mpe ya Caraïbes elobaki ete mabele na bango ezali ‘esika ya kimya’ mpo bayokanaki bábongisaka matata na bango kozanga kobunda. Ban Ki-moon, secrétaire général ya ONU azalaki na kati ya bato oyo bazalaki na likita yango.

^ par. 7 Awa, maloba “nyama oyo eumeli mingi” elongoli mwa banyama mikemike oyo ezalaka liboke, na ndakisa mwa banyama babengi corail, oyo balobaka ete eumeli na bomoi bankóto ya bambula.