Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Lamuká!  |  Sanza ya Juin 2014

 BIBLIA ELOBI NINI?

Liwa

Liwa

Bakufi bazali wapi?

“Ozali putulu mpe okozonga na putulu.”​Ebandeli 3:19.

OYO BATO BALOBAKA

Bamosusu bakanisaka ete soki moto akufi akobaka kozala na bomoi na mokili mosusu, na likoló, na lifelo, na epongelo to na limbe. Basusu bandimaka ete moto abotamaka lisusu na bomoi ya lolenge mosusu. Na ngambo mosusu, baoyo bandimaka te mateya wana ya mangomba bakanisaka ete liwa ezali kaka nsuka ya bomoi ya moto.

OYO BIBLIA ELOBI

Mosakoli 9:10 elobi ete “mosala ezali te, mwango te, boyebi te, bwanya mpe te na Nkunda, esika ozali kokende.” Biblia elimboli mpe oyo ekómelaka bato ná banyama soki bakufi. Elobi boye: “Bango nyonso bakokende esika moko. Bango nyonso bauti na putulu, mpe bango nyonso bazali kozonga na putulu.”​—Mosakoli 3:20.

 Moto akómaka ndenge nini soki akufi?

“Elimo na ye ekobima, akozonga na mabele; na mokolo yango makanisi na ye ekufi.”​—Nzembo 146:4.

OYO BATO BALOBAKA

Bateyá bato mingi ete makambo oyo moto akutanaka na yango nsima ya liwa etalelaka makambo oyo asalaki ntango azalaki na bomoi awa na mabele. Soki asalaki makambo ya malamu, akozwa bolamu ya seko; soki asalaki makambo ya mabe, akonyokwama seko na seko. Balobaka ete esengeli moto apɛtolama na masumu liboso bápesa ye nzela ya kokende komona Nzambe nsima ya liwa. Balobaka ete baoyo bapɛtolami te bakozwa esengo wana te mpo na libela.

OYO BIBLIA ELOBI

Bakufi bayokaka esengo te, mpasi mpe te. Kutu, lokola bayebaka eloko te, bakoki koyoka ata eloko moko te; bakoki mpe te kosalisa to konyokola bato ya bomoi. Mosakoli 9:5, 6 elobi boye: “Bato ya bomoi bayebi ete bakokufa; kasi bakufi bayebi ata eloko moko te . . . Lisusu, bolingo na bango ná koyina na bango ná zuwa na bango esili, mpe bazali na likabo ata moko lisusu te mpo na ntango oyo etyami ndelo te na eloko nyonso oyo ekosalema na nse ya moi.”

Elikya nini ezali mpo na bakufi?

“Soki mobali makasi akufi, akoki kozonga lisusu na bomoi? Mikolo nyonso ya kotindama oyo natindamaka na mosala makasi, nakozela, tii ntango kobɔndisama na ngai ekoya.”​—Yobo 14:14.

OYO BATO BALOBAKA

Bato mingi bakanisaka ete soki moto akei lifelo, elikya ezali lisusu te mpo na ye. Balobaka ete bato banyokwamaka na lifelo libela na libela. Balobaka ete baoyo bazali na epongelo bakomona bisengo ya lola kaka nsima ya kopɛtolama na masumu na bango.

OYO BIBLIA ELOBI

Nsima ya kopema na liwa, Mwana ya Nzambe akosekwisa bakufi, to akozongisa bango lisusu na bomoi na mabele. Biblia elobi boye: “Bókamwa te mpo na yango, mpamba te ngonga ezali koya wana baoyo nyonso bazali na kati ya malita bakoyoka mongongo na ye mpe bakobima.” (Yoane 5:26, 28, 29) Bizaleli oyo moto akomonisa na nsima nde ekokata soki akozwa bomoi ya seko to te. *

^ par. 14 Mpo na koyeba makambo mosusu oyo etali lisekwa, talá mokapo 7 ya buku Biblia eteyaka mpenza nini? ebimisami na Batatoli ya Yehova.