Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Yesu azali nzela, solo mpe bomoi

 MOKAPO 8

Babiki na mabɔkɔ ya mokonzi moko mabe

Babiki na mabɔkɔ ya mokonzi moko mabe

MATAI 2:13-23

  • LIBOTA YA YESU EKIMI NA EZIPITO

  • YOZEFE AKEI NA LIBOTA NA YE NA NAZARETE

Yozefe alamwisi Maria na mpɔngi mpo na koyebisa ye nsango moko ya ntina mpenza. Anzelu ya Yehova auti kobimela ye na ndɔtɔ mpe ayebisi ye ete: “Tɛlɛmá, kamatá mwana ná mama na ye mpe kimá na Ezipito, mpe fandá kuna tii ntango nakoloba na yo ozonga; mpo Erode alingi koluka mwana yango mpo aboma ye.”​—Matai 2:13.

Mbala moko, Yozefe ná Maria mpe mwana na bango bakimi na butu. Basali yango na ntango ebongi, mpo Erode ayebi ete banganga-minzoto bakosaki ye. Ayebisaki bango bázongela ye. Kasi balongwaki na mboka kozanga kozongela ye. Erode ayoki nkanda makasi. Lokola alingi kaka koboma Yesu, apesi etinda ete báboma bana mibali nyonso ya mike na Beteleme mpe na bamboka ya zingazinga, oyo bazali na mbula mibale tii na nse. Atye mbula wana na kotalela makambo oyo banganga-minzoto bayebisaki ye.

Kobomama ya bana mibali wana ya mike ezali mpenza likambo ya nsɔmɔ! Tokoki koyeba te bana boni babomamaki, kasi kolela mpe koganga wana ya mpasi ya bamama ya bana yango ekokisi esakweli moko ya Biblia oyo Nzambe ayebisaki mosakoli Yirimia.​—Yirimia 31:15.

Na ntango wana, Yozefe ná libota na ye bakimaki na Ezipito, mpe bakobaki kofanda kuna. Na nsima, na butu moko anzelu ya Yehova abimeli lisusu Yozefe na ndɔtɔ. Alobi na ye boye: “Tɛlɛmá, kamatá mwana ná mama na ye mpe kende na mokili ya Yisraele, mpo baoyo bazalaki koluka molimo ya mwana yango bakufi.” (Matai 2:20) Sikoyo Yozefe amoni ete libota na ye ekoki kozonga na mboka na bango. Na lolenge yango, esakweli mosusu ya Biblia oyo elobaki ete mwana ya Nzambe abengamaki ete alongwa na Ezipito ekokisami.​—Hosea 11:1.

Emonani ete, Yozefe azali na mposa libota na ye etikala na Yudea, mbala mosusu pene ya engumba Beteleme, esika bazalaki kofanda liboso bákima  na Ezipito. Kasi ayoki ete Arkelausi mwana moko mabe ya Erode azali sikoyo koyangela Yudea. Na ndɔtɔ mosusu, Nzambe akebisi Yozefe na likama yango. Yozefe mpe libota na ye bakei na nɔrdi kofanda na engumba ya Nazarete na teritware ya Galile, mosika na mboka monene ya losambo ya Bayuda. Yesu akoli na engumba wana, mpe yango ekokisi esakweli mosusu oyo elobaki ete: “Bakobenga ye Monazarete.”​—Matai 2:23.

Makambo mosusu

LINƆ́NGI YA MOSƐNZƐLI—YA BOYEKOLI

Mituna ya batángi—12/2014

Yirimia alingaki koloba nini ntango alobaki ete Rashele azali kolela bana na ye?

MEKOLÁ KONDIMA NA BANGO

Yozefe abatelaki, asungaki mpe alɛmbaki bango te

Na makambo nini Yozefe abatelaki libota na ye? Mpo na nini akendaki na Maria mpe Yesu na Ezipito?