Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Buku ya mobu 2016 ya Batatoli ya Yehova

 MAKAMBO YA ESENGO YA MBULA ELEKI

Kotonga Bandako ya Bokonzi nokinoki

Kotonga Bandako ya Bokonzi nokinoki

EZALI esengo mpenza komona ete Yehova azali kosalisa losambo ya solo epalangana nokinoki na mokili mobimba! (Yis. 60:22) Na yango, ezali kosɛnga kokoba kotonga Bandako ya Bokonzi. Na mokili mobimba, esengeli kotonga to kobongisa Bandako ya Bokonzi koleka 13 000.

Mpo mosala yango esalema nokinoki mpe na ndenge oyo ekobatela mbongo, Lisangani ya Mikóló-Bakambi ebongisi makambo na badepartema ya botongi. Departema ya sika oyo eutaki kosalema, Departema ya kosala baplan mpe ya kotonga na mokili mobimba (WDC), oyo ezali na biro monene na Brooklyn, na New York, ezali kosala nyonso mpo na koyeba misala ya kotonga  mpe ya kobongisa bandako oyo esengeli kosalema libosoliboso mpe nokinoki na mokili mobimba. Departema mokomoko ya kosala baplan mpe kotonga na bitúká (LDC) oyo ezali na biro ya filiale ya Afrika ya Sudi, Allemagne, Australie, mpe États-Unis ezali kotambwisa misala na bitúká na yango; ezali kolandela mingimingi ndenge ya kotonga Bandako ya Bokonzi nokinoki, kasi na mbongo mingi te. Departema yango elakisaka mpe bandeko ya Babetele ndenge ya kobatela bandako ya losambo na bamboka na bango. Mpe na Betele mokomoko, Departema ya kosala baplan mpe kotonga na ekólo (LDC) ezali kotambwisa mosala ya kotonga mpe kobatela Bandako ya Bokonzi mpe Bandako ya mayangani.

Na sanza ya yambo ya 2015, bankulutu nyonso ya États-Unis balandaki likita moko na nzela ya video. Na likita yango balobelaki ebongiseli moko ya sika mpo na kosala baplan, kotonga, mpe kobatela Bandako ya Bokonzi. Yango nde bayokaki.

  • Kotonga: Bakosala baplan ya ndenge moko mpe bakosalela bisaleli oyo ebongi na mboka mokomoko na kolanda malako oyo euti na Komite ya kobimisa mikanda ya Lisangani ya Mikóló-Bakambi. Bandako yango ekotongama malamu mpe ekozala makasi; ekomonana kitoko kasi ekosɛnga mbongo mingi te.

  • Kobongisa: Bakolakisa bandeko ya masangá ndenge ya kobatela bisika na biso ya losambo mpo ebeba noki te.

Ya solo, mosala ya kotonga mpe kobongisa bisika ya losambo ezali monene mpenza. Kasi milende oyo basaleli nyonso ya Nzambe bakosala ekosalisa mingi mpo mosala yango esalema nokinoki kasi na ndenge oyo ekobebisa mbongo mingi te.