Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Buku ya mobu 2015 ya Batatoli ya Yehova

 RÉPUBLIQUE DOMINICAINE

Makambo etali République dominicaine

Makambo etali République dominicaine

Mokili République dominicaine ezwá eteni monene (2/3) ya esanga ya Hispaniola; eteni mosusu ezali Haïti. Na mokili ya République dominicaine, okokuta bazamba epai bambula enɔkaka mingi, bangomba ya milai, banzete ya mangrove, mpe mikili ekauká. Ngomba oyo eleki molai na République dominicaine ezali Pico Duarte, oyo ezali na molai ya mɛtrɛ 3 175. Pembenipembeni ya ebale, okokuta ebele ya mabongo ya zɛlo ya mpɛmbɛ; mpe na kati ya mboka, ezali na mabwaku oyo ebotaka mingi, na ndakisa Lobwaku Cibao.

Bato Loposo ya bato mingi ya République dominicaine esangisá loposo ya bato ya Mpoto mpe ya Afrika. Ezali mpe na mwa bato ya loposo mosusu; mingi bautá Haïti.

Monɔkɔ Monɔkɔ ya Leta ezali Espagnol.

Bandeko bafandi elongo na esengo

 Ndenge ya kobikela Banda kala, bakompanyi ya mabanga ya ntalo, ya sukali, ya kafe, mpe ya makaya nde esalisaka bato bázwa mbongo ya kobikela. Mikolo oyo, nkita emati mpo na bapaya oyo bayaka kotala mboka mpe mpo na baizine oyo ezali na mboka.

Mopɛpɛ Esanga yango ezalaka na mopɛpɛ ya molunge mpenza te, mbala mingi ezalaka 25°C. Mbula enɔkaka mingi na nɔrdi-ɛsti, esika bangomba ezalaka mingi, kasi enɔkaka mingi te na bisika mosusu. Na bantango mosusu, bambula mpe mipɛpɛ makasi ebɛtaka esanga yango.

Mimeseno Bato ya République dominicaine balingaka mingi loso, madesu, mpe ndunda. Basepelaka mpe na mbisi mpe biloko mosusu ya mai, bambuma, pilipili ya ndenge na ndenge, mpe makemba bakalingá. Okokuta biloko yango mosusu na bilei oyo bato mingi balambaka kuna; babengaka yango La Bandera Dominicana (bɛndɛlɛ ya République dominicaine). Bato ya République dominicaine basepelaka mingi na lisano ya baseball, balingaka mpe miziki mpe kobina, mingimingi mérengué. Balingaka mpe kobɛta gitare, mbonda, piololo, mpe marimba.