Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Biblia eteyaka mpenza nini?

APƐNDISI

Sheole ná Hadesi ezali nini?

Sheole ná Hadesi ezali nini?

NA MINƆKƆ oyo bakomaki na yango Biblia na ebandeli, basaleli liloba ya Liebele sheohl, mpe liloba ya Grɛki haides, mbala koleka 70; maloba yango ezali na ndimbola moko. Maloba yango mibale etali liwa. Babiblia mosusu ebongoli yango “lilita,” “lifelo,” “libulu,” to “esika ya bakufi.” Nzokande minɔkɔ mingi ezali na maloba ya sikisiki te oyo ndimbola na yango ekokani na maloba wana ya Liebele mpe ya Grɛki. Maloba sheohl mpe haides elimboli mpenza nini? Tótala ndenge basaleli maloba yango na bavɛrsɛ mosusu.

Mosakoli 9:10 elobi ete: “Ezali na mosala te, to mwango te, to mayele te, to boyebi te kati na esika ya bakufi [sheohl], esika ekokenda yo.” Yango elingi nde koloba ete sheohl elakisi lilita oyo, ntango mosusu, bakundá ndeko to moninga moko? Te. Soki Biblia ezali kolobela nkunda, to lilita moko boye, esalelaka maloba sheohlhaides te; esalelaka maloba mosusu ya Liebele mpe ya Grɛki. (Genese 23:7-9; Matai 28:1) Longola yango, Biblia esalelaka liloba sheohl te mpo na kolobela lilita moko oyo bakundi bato mingi, na ndakisa lilita mpo na bato ya libota moko to mpo na bato ebele.—Genese 49:30, 31.

Bongo, sheohl elakisi esika ya ndenge nini? Liloba ya Nzambe emonisi ete sheohl, to haides, elakisi eloko moko oyo eleki ata lilita ya monene mpenza oyo esalemi mpo na kokunda bato ebele. Na ndakisa, Yisaya 5:14 elobi ete “esika ya bakufi [sheohl] emikómisi monene mpe ezipoli monɔkɔ na yango koleka epimeli.” Atako sheohl esilá komɛla ebele ya bato oyo bakufá, ezali komonana ete ezali kaka na mposa ya komɛla bato mosusu. (Masese 30:15, 16) ‘Ewelo [sheohl] etondaka te’; nzokande, bisika oyo bakundaka bibembe etondaka. (Masese 27:20) Sheohl ezali na ndelo te. Na yango, sheohl, to haides, ezali te esika moko oyo tokoki komona na miso. Ezali nde malita ya bato nyonso oyo bakufá, esika moko ya elilingi epai bato mingi oyo bakufá bazali.

Liteya ya lisekwa oyo ezali na Biblia esalisaka biso tóyeba lisusu malamumalamu ndimbola ya sheohl mpe haides. Ntango Liloba ya Nzambe elobelaka bakufi oyo bakoki kosekwa, esalelaka maloba sheohl mpe haides.* (Yobo 14:13; Misala 2:31; Emoniseli 20:13) Liloba ya Nzambe emonisi mpe ete ezali kaka te baoyo basalelaki Yehova nde bazali na kati ya sheohl, to haides; bato mingi oyo basalelaki ye te bazali mpe kuna. (Genese 37:35; Nzembo 55:15) Yango wana, Biblia ezali koteya ete ekozala na “lisekwa moko ya bayengebene mpe ya bato oyo bazangi boyengebene.”—Misala 24:15.


*  Nzokande, mpo na bakufi oyo bakosekwa te, Biblia elobi ete bazali “na Gehena,” kasi na Sheole, to Hadesi, te. (Matai 5:30; 10:28; 23:33) Lokola Sheole ná Hadesi, Gehena ezali esika moko ya elilingi.

← Talá mikapo