Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Mokanda mpo na Masolo ya Biblia

Lisolo 105: Bazeli na Yerusaleme

Lisolo 105: Bazeli na Yerusaleme

BATO oyo bozali komona awa ezali bayekoli ya Yesu. Batikali na Yerusaleme, ndenge Yesu ayebisaki bango. Wana bafandi bango nyonso elongo bazali kozela, na mbala moko, lokito moko lokola oyo ya mopɛpɛ makasi eningisi ndako oyo bazali. Na nsima, ndemo ya mɔtɔ emonani na mitó ya moyekoli mokomoko. Ozali komona ndemo yango ya mɔtɔ na mitó na bango? Yango elingi koloba nini?

Elimo santu ekiteli bayekoli ya Yesu

Ezali likamwisi! Yesu azongi na likoló epai ya Tata na ye, mpe asopeli bayekoli na ye elimo santu ya Nzambe. Elimo yango ekotinda bayekoli yango básala nini? Bango nyonso babandi koloba na minɔkɔ ndenge na ndenge.

Bato mingi na Yerusaleme bazali koyoka makɛlɛlɛ wana mpe bayei mbangu kotala nini ezali kosalema. Bato mosusu bauti na mikili ndenge na ndenge, mpe bayei na Yerusaleme mpo na kosala fɛti ya Pantekote. Bato yango bakamwe mingi. Bayoki bayekoli bazali koloba, na monɔkɔ ya mboka ya moto mokomoko na kati na bango, makambo ya malamu oyo Nzambe asalaki.

Bapaya yango balobi ete: ‘Bato oyo nyonso bazali bato ya Galile. Bongo ndenge nini bazali koloba minɔkɔ ya bamboka oyo touti?’

Bongo Petro atɛlɛmi mpo na kolimbwela bango. Alimbweli bato ndenge Yesu abomamaki mpe na nsima Yehova asekwisaki ye. Na nsima Petro alobi ete: ‘Sikoyo Yesu azali na likoló, na lobɔkɔ ya mobali ya Nzambe. Mpe asopi elimo santu oyo alakaki. Yango wana bomoni mpe boyoki makamwisi oyo.’

Ntango Petro alobi makambo wana, mingi bayoki mawa mpo na makambo oyo basalelaki Yesu. Bongo batuni Petro ete: ‘Tosengeli kosala nini?’ Ntoma Petro ayebisi bango ete: ‘Bóbongola mitema mpe bóbatisama.’ Na mokolo yango, bato soki nkóto misato (3 000) bazwi batisimo mpe bakómi bayekoli ya Yesu.

Misala 2:1-47.



Mituna

  • Ndenge ozali komona na elilingi, likambo nini ekómeli bayekoli ya Yesu oyo bazalaki kozela na Yerusaleme?
  • Likambo nini ekamwisi bapaya oyo bayaki na Yerusaleme?
  • Petro alimbweli bato nini?
  • Bato bamiyoki ndenge nini ntango bayoki makambo oyo Petro alobi, mpe Petro alobi na bango básala nini?
  • Bato boni bazwaki batisimo na mokolo ya Pantekote ya mobu 33 T.B.?

Mituna mosusu

Makambo mosusu

YESU AZALI NZELA, SOLO MPE BOMOI

Bato ebele bamoni ye liboso ya Pantekote

Banda ntango Yesu asekwi tii ntango amati na likoló, ayebisi bayekoli na ye mbala na mbala ete bakozwa elimo santu mpe ayebisi bango ndenge ya kosalela yango.