Lakisá makambo oyo ezali na kati

kende na sous-menu

Kende na mitó ya makambo

Batatoli ya Yehova

Lingala

Mokanda mpo na Masolo ya Biblia

Lisolo 28: Babikisi Moize

Lisolo 28: Babikisi Moize

MWANA moke oyo bozali komona awa azali kolela mpe asimbi mosapi ya elenge mwasi moko, ezali Moize. Elenge mwasi kitoko wana ezali mwana ya Farao, mokonzi ya Ezipito.

Mwana mwasi ya Farao azwi Moize

Mama ya Moize abombaki ye sanza misato mobimba, mpo alingaki te ete Baezipito báboma ye. Kasi ayebaki ete akokoka kobomba ye ntango molai lisusu te. Asalaki nini?

Akamati kitunga, apakoli yango gudrɔ mpo mai ekɔta te. Alalisi Moize na kati, mpe atye yango na matiti na Ebale Nile. Bongo ayebisi Miriame, yaya ya Moize, ete atikala pembenipembeni wana atalaka nini ekokómela mwana.

Mosika te, mwana mwasi ya Farao akiti na Ebale Nile mpo na kosukola. Abwaki miso na matiti mpe amoni kitunga moko kuna na kati. Atindi mosaleli na ye azwa yango. Ntango afungoli kitunga, amoni mwana ya kitoko mpenza. Moize azali kolela mpe mwana mwasi ya mokonzi ayokeli ye mawa. Alingaki te ete báboma ye.

Na ntango yango Miriame ayei. Bozali komona ye na elilingi? Miriame atuni mwana mwasi ya Farao ete: ‘Olingi ete nakende kobenga mwasi moko Moyisraele mpo amɛlisela yo mwana oyo mabɛlɛ?’

Mwana mwasi ya mokonzi alobi na ye ete: ‘Kende.’

Bongo Miriame akei mbangu kobenga mama na ye. Ntango mama ya Moize akómi, mwana mwasi ya mokonzi alobi na ye ete: ‘Zwá mwana oyo mpe mɛliselá ngai ye mabɛlɛ mpe nakofuta yo.’

Na yango, mama ya Moize abɔkɔlaki mwana na ye ye moko. Ntango Moize akoli, mama na ye akei kotika ye epai ya mwana mwasi ya Farao mpe akómaki mwana na ye. Ezali na ndenge wana nde Moize abɔkwamaki na ndako ya Farao.

Kobima 2:1-10.



Mituna

  • Mwana oyo ozali komona na elilingi ezali nani, mpe asimbi mosapi ya nani?
  • Mama ya Moize asalaki nini mpo báboma Moize te?
  • Elenge mwasi oyo ozali komona na elilingi ezali nani, mpe azali kosala nini?
  • Ntango mwana mwasi ya Farao azwi mwana yango, Miriame apesaki ye likanisi nini?
  • Mwana mwasi wana ya mokonzi ayebisaki mama ya Moize nini?

Motuna mosusu

Makambo mosusu

MPO NA LOSAMBO NA KATI YA LIBOTA

Moize akoli na Ezipito

Liteya nini tokoki kozwa na makambo oyo elekaki na bomoi ya Moize ntango azalaki mwana moke na Ezipito? Zwá makambo oyo mpe bólobela yango na libota.