Zabolo ná bademo basalaka makambo mingi na bomoi ya bato; kutu Biblia elobi ete “mokili mobimba ezali na maboko ya Monguna.” (1 Yoane 5:19, Bible na lingala ya lelo oyo) Biblia emonisi mayele ndenge na ndenge oyo Zabolo asalelaka mpo na kotambwisa bomoi ya bato.

•   Lokuta. Biblia elendisi bakristo ete ‘bátɛlɛma ngwi liboso ya mayele mabe ya Zabolo.’ (Baefese 6:11) Moko ya mayele mabe oyo Zabolo asalelaka ezali ya kokosa bato mpo bákanisa ete bato na ye bazali basaleli ya Nzambe.​—2 Bakorinti 11:13-15.

•   Bikelakela. Mpo na kokosa bato, Zabolo asalelaka mpe banganga-nkisi, bato oyo balobaka makambo oyo ekoya, mpe bato ya astroloji. (Kolimbola Mibeko 18:10-12) Komɛla bangi, hypnotisme, mpe komanyola to méditation oyo elongolaka moto makanisi nyonso ekɔtisaka mpe moto na boyokani na bilimo mabe.​—Luka 11:24-26.

•   Mangomba ya lokuta. Mangomba oyo eteyaka makambo ya lokuta etindaka bato bábuka mibeko ya Nzambe. (1 Bakorinti 10:20) Biblia ebengi mateya wana ya lokuta “mateya ya bademo.”​—1 Timote 4:1.

•   Kokɔtela moto. Biblia elobeli masolo ya bato oyo bademo bakɔtelaki bango. Na bantango mosusu, okomona moto akufi miso, to azali koloba te, to kutu alingi komisala mabe.​—Matai 12:22; Marko 5:2-5.

Okoki kosala nini mpo Zabolo atambwisa yo te?

 Ntina ya kobanga ete bademo bátambwisa bomoi na yo ezali te, mpo Biblia elobeli makambo oyo okoki kosala mpo na kotɛmɛla Zabolo:

•   Yebá makambo oyo Zabolo asalaka mpo na kokosa bato mpo ‘oyeba malamu mayele na ye.’​—2 Bakorinti 2:11.

•   Yekolá Biblia, mpe saleláká makambo oyo ozali koyekola. Kosalela batoli oyo ozali koyekola na Biblia ekobatela yo mpo Zabolo atambwisa bomoi na yo te.​—Baefese 6:11-18.

•   Bwaká eloko nyonso oyo ezali na boyokani na misala ya bademo. (Misala 19:19) Ekoki kozala miziki, babuku, ba journal, bafɔtɔ, mpe bavideo oyo elobelaka misala ya bilimo mabe.