Lakisá makambo oyo ezali na kati

Biblia elobi nini na likambo ya kotya monzɛlɛ na elongi mpe kolata babiju?

Biblia elobi nini na likambo ya kotya monzɛlɛ na elongi mpe kolata babiju?

Eyano ya Biblia

Atako Biblia elobeli yango mpenzampenza te, epekisi te kotya monzɛlɛ na elongi, kolata babiju to biloko mosusu ya monzɛlɛ. Kasi, na esika elobela mingi kitoko ya nzoto, Biblia elendisi nde “molato oyo epɔlaka te ya elimo ya kimya mpe ya boboto.”​—1 Petro 3:3, 4.

Kosala monzɛlɛ epekisami te

  • Basi ya sembo na ntango ya kala bazalaki kosala monzɛlɛ. Rebeka, oyo abalanaki na Yisaka mwana ya Abrahama, alataki lopɛtɛ ya wolo na zolo, bikɔmɔ (bracelets) na mabɔkɔ mpe babiju mosusu ya ntalo oyo bokilo na ye ya Abrahama apesaki ye. (Ebandeli 24:22, 30, 53) Ndenge moko mpe, Estere andimaki bápesa ye “bankisi na ye ya konyɔlisa nzoto” mpo amibongisa na mokumba oyo akozwa ya kokóma mwasi ya mokonzi ya Ampire ya Perse. (Estere 2:7, 9, 12) Emonani lokola bankisi yango esɛngaki mpe asalela “mafuta na malasi,” to “biloko nyonso oyo asengelaki na yango po na komikómisa kitoko.”​—Biblia Haut fleuve; Bible na lingala ya lelo oyo.

  • Bandakisa oyo Biblia esaleli elobeli babiju na ndenge ya malamu. Na ndakisa, moto oyo apesaka toli ya malamu akokani na “eloko ya litoi oyo esalemi na wolo” mpo na moto oyo ayoki toli yango. (Masese 25:12) Ndenge moko mpe, Nzambe akokanisaki ndenge oyo azalaki kosalela Bayisraele makambo na mobali oyo alatisi fianse na ye bikɔmɔ na mabɔkɔ, nsinga ya monzɛlɛ na nkingo mpe biloko ya matoi. Biloko yango ya monzɛlɛ ekómisaki ekólo yango “kitoko mingi.”​—Ezekiele 16:11-13.

Makanisi ya libunga na likambo ya kosala monzɛlɛ mpe kolata babiju

Libunga: Na 1 Petro 3:3, Biblia epekisi “kokanga nsuki mpe kolata biloko kitoko ya wolo.”

Solo: Bavɛrsɛ oyo ezali liboso ya vɛrsɛ yango emonisi ete Biblia ezali kokumisa nde kitoko ya kati koleka kitoko ya libanda to monzɛlɛ. (1 Petro 3:3-6) Biblia elobeli mpe likambo yango na bavɛrsɛ mosusu.​—1 Samwele 16:7; Masese 11:22; 31:30; 1 Timote 2:9, 10.

Libunga: Lokola mokonzi mwasi mabe Yezabele apakolaki biloko ya monzɛlɛ ya moindo na miso to “maskara,” yango emonisi ete kopakola biloko yango na elongi ezali mabe.​—2 Bakonzi 9:30.

Solo: Yezabele, oyo asalaki misala ya bonganga-nkisi mpe azalaki mobomi bato, azwaki etumbu mpo na misala na ye ya mabe, kasi te mpo na monzɛlɛ.​—2 Bakonzi 9:7, 22, 36, 37.