Lakisá makambo oyo ezali na kati

kende na sous-menu

Batatoli ya Yehova

Lingala

Kosakola nsango malamu na bamboka oyo ezali pembenipembeni ya Ebale Xingu

Kosakola nsango malamu na bamboka oyo ezali pembenipembeni ya Ebale Xingu

Na ebandeli ya sanza ya 07/2013, Batatoli ya Yehova 28 ya engumba São Félix do Xingu, na Brésil, bakendaki na teritware ya Ba-Indien, Kayapo mpe Yuruna. Na lisalisi ya bwato ya molai ya mɛtrɛ 15 basalaki mobembo yango na Ebale Xingu, oyo etyolaka na kilomɛtrɛ 2 092 na nɔrdi mpo na komibwaka na Ebale Amazone.

Bandeko basalaki mobembo yango mpo na kosakola nsango etali Bokonzi ya Nzambe epai ya baoyo bafandaka na bamboka oyo ezwami pembenipembeni ya ebale. Bakómaki na mboka Kokraimoro na mokolo ya misato mpe bayambaki bango na esengo na bato oyo bayebi koyamba bapaya. Bakutanaki na mwasi moko oyo azalaki kosala bajɛstɛ bisalasala. Moto oyo azalaki kotambwisa bango alimbolelaki bango makambo oyo mwasi yango azalaki koloba na bango: “Bajɛstɛ yango elakisi: ‘Bóya bino nyonso. Tolingi koyeba bino nyonso!’”

Batatoli ya Yehova basololaki na moto nyonso​—bamosusu basololaki na bango na monɔkɔ ya portugais to na bilembo mpe bajɛstɛ. Bililingi ya langi oyo ezalaki na mikanda bamemaki esalisaki mpenza. Mingi ya bato ya mboka yango bandimaki kozwa mikanda yango; mingimingi mwa buku Yoká Nzambe.

Gerson, ndeko moko oyo alekisaka ngonga mingi na mosala ya kosakola na à São Félix do Xingu, akanisi lisusu ndenge mobali moko asalaki ntango azwaki buku Mokanda mpo na masolo ya Biblia: “Asimbaki yango makasi na mabɔkɔ mibale mpe azalaki kotalatala yango; aboyaki kutu kolalisa yango.”

Batatoli ya Yehova batikelaki bato oyo basepelaki babuku, bazulunalo mpe mwa bakuku soki 500. Bato oyo bafandaka na Kawatire bayokaki Batatoli ya Yehova na likebi mpenza ntango balimbolelaki bango ete Biblia elaki paradiso awa na mabele. Tonjaikwa, moto moko ya Kayapo oyo ayambaki bandeko malamu, alobaki boye: “Na paradiso, bato bakozala na bomoi lokola oyo ya biso.”

Bato mingi ya São Félix do Xingu, bayebaki mobembo yango. Simone, oyo asalaki mpe mobembo yango, alobaki ete na mboka oyo autá, bamosusu bazalaki kokanisa ete bakopesa bango nzela te ya kokɔta na mboka yango. Kasi mokakatano ezalaki te. Simone alobaki boye: “Bayambaki biso malamu mpe tosakwelaki bato nyonso nsango malamu.”