Lakisá makambo oyo ezali na kati

kende na sous-menu

Batatoli ya Yehova

Lingala

Mpo na nini bolingaka te bázongisa bino makila?

Mpo na nini bolingaka te bázongisa bino makila?

Makambo oyo bato bakanisaka

Makanisi ya bato: Batatoli ya Yehova bandimaka mayele ya monganga te mpe bakendaka lopitalo te.

Likambo ya solo: Tolukaka nkisi ya malamu oyo ekoki kosalisa biso moko mpe bana na biso. Soki moto abɛli, tokendaka epai ya minganga oyo bayebi mosala malamu mpe oyo basalaka lipaso kozanga kozongisa makila. Tosepelaka mingi ndenge minganga bazali koyekola makambo ebele. Kutu, mayele oyo minganga basalelaka mpo na kosalisa Batatoli ya Yehova kozanga kozongisa bango makila, bakómi sikoyo kosalela yango mpo na bato nyonso. Na mikili mingi, moto nyonso oyo abɛli akoki kopona koboya bázongisa ye makila mpo na kokima makama lokola bamaladi oyo epesamaka na makila, kotya moto makila oyo nzoto na ye endimi te, mpe mabunga oyo minganga bakoki kosala.

Makanisi ya bato: Batatoli ya Yehova balobaka ete kondima nde ebikisaka moto soki abɛli.

Likambo ya solo: Tosalaka makamwisi ya kobikisa bato te.

Makanisi ya bato: Kozwa lisalisi ya monganga kozanga ete bázongisa yo makila ezalaka ntalo mingi.

Likambo ya solo: Kozwa lisalisi ya monganga kozanga kozongisa makila esalisaka moto abimisa mbongo mingi te. *

Makanisi ya bato: Mbula na mbula, Batatoli ya Yehova ebele, ata mpe bana na bango, bakufaka mpo baboyaka bázongisa bango makila.

Likambo ya solo: Makanisi wana ezangá motó ná makolo. Minganga mingi basalaka mapaso ya minene (mapaso ya motema, ya mikuwa, kotya moto enama ya sika) kozanga ete bázongisa makila. * Mbala mingi, bato ya maladi, ata mpe bana, oyo batyaki bango makila te baumelaka te koyoka nzoto malamu mpe babikaka noki koleka bato oyo bandimaki bázongisa bango makila. * Mpo na koloba solo, moto moko te akoki mpenza koyeba soki moto ya maladi akokufa soki aboyi makila to akobika soki andimi makila.

Mpo na nini Batatoli ya Yehova baboyaka bázongisa bango makila?

Ezali mpo na makambo oyo tondimaka, kasi etali mayele ya monganga te. Ezala na Kondimana ya Kala to na Kondimana ya Sika, Biblia esɛngi biso polele ete tóboya makila. (Ebandeli 9:4; Balevi 17:10; Kolimbola Mibeko 12:23; Misala 15:28, 29) Lisusu, na miso ya Nzambe, makila ezali bomoi. (Balevi 17:14) Na yango, toboyaka makila mpo na kotosa Nzambe, kasi mpe mpo na kopesa ye limemya, ye Mopesi ya bomoi.

Bato bazali kobongola makanisi

Minganga bakoki kosala malamu mapaso ya minene kozanga ete bázongisa makila

Liboso, minganga mingi bazalaki komona ete kosalela mayele mosusu na esika ya kozongisa makila ezali kolekisa ndelo, to kutu koluka komiboma; kasi mikolo oyo makanisi na bango ezali kobongwana. Na ndakisa, na 2004, lisolo moko oyo ebimaki na zulunalo ya makambo etali mosala ya monganga elobaki ete “mayele oyo ezali kosalelama sikoyo mpo na kosalisa Batatoli ya Yehova ekokóma mpo na bato nyonso na bambula ezali koya.” Na 2010, lisolo oyo ebimaki na zulunalo mosusu (Heart, Lung and Circulation) elobaki ete “‘kosala lipaso kozanga kozongisa makila’ esengeli kosuka kaka na Batatoli ya Yehova te; tosengeli kosalaka bongo na mapaso nyonso.”

Lelo oyo, minganga ebele na mokili mobimba basalelaka mayele ya kobatela makila mpo básala mapaso ya minene kozanga ete bázongisa makila. Ata na mikili ya bobola, minganga bazali kosalela mayele ya ndenge wana na esika ya kozongisa moto makila, mpe bato mingi oyo bazali Batatoli ya Yehova te bazali kosɛnga yango.

Talá Transfusion and Apheresis Science, Volimi 33, No. 3, lok. 349.

^ par. 8 Talá The Journal of Thoracic and Cardiovascular Surgery, Volimi 134, No. 2, nk. 287-288; Texas Heart Institute Journal, Volimi 38, No. 5, lok. 563; Basics of Blood Management, lok. 2; mpe Continuing Education in Anaesthesia, Critical Care & Pain, Volimi 4, No. 2, lok. 39.

^ par. 10 Talá The Journal of Thoracic and Cardiovascular Surgery, Volimi 89, No. 6, lok. 918; mpe Heart, Lung and Circulation, Volimi 19, lok. 658.

^ par. 10 Continuing Education in Anaesthesia, Critical Care & Pain, Volimi 4, No. 2, lokasa 39.