Lakisá makambo oyo ezali na kati

Kende na mitó ya makambo

 BOMOI YA BAKRISTO

“Paulo apesaki Nzambe matɔndi mpe azwaki mpiko”

“Paulo apesaki Nzambe matɔndi mpe azwaki mpiko”

Ntango bandeko ya lisangá ya Roma bayokaki ete Paulo azali koya, etuluku ya bandeko esalaki mobembo ya kilomɛtrɛ soki 64 mpo na kokutana na ye. Paulo ayokaki ndenge nini mpo na bolingo oyo bamoniselaki ye ndenge bamipimelaki? “Ntango amonaki bango, Paulo apesaki Nzambe matɔndi mpe azwaki mpiko.” (Mis 28:15) Atako Paulo ayebanaki lokola moto oyo alendisaka masangá oyo azalaki kokende kotala, na libaku oyo lokola azalaki mokangami, ye nde balendisaki.​—2Ko 13:10.

Lelo oyo bakɛngɛli ya zongazonga bakendaka na masangá mpo na kolendisa bandeko. Ndenge moko na basaleli nyonso ya Yehova, na bantango mosusu, balɛmbaka, bamitungisaka mpe bakutanaka na makambo oyo elɛmbisaka bango nzoto. Na mbala ya nsima oyo mokɛngɛli ya zongazonga ná mwasi na ye bakoya kotala lisangá na bino, okoki kosala nini mpo na kosalisa bango bazwá makasi mpo ‘bólendisana’?​—Ro 1:11, 12.

  • Kende na likita ya mosala ya kosakola. Mokɛngɛli ya zongazonga alendisamaka soki basakoli bamipimeli makambo mosusu mpo na kopesa mpenza mabɔkɔ na mosala ya kosakola na pɔsɔ ya ntina. (1Te 1:2, 3; 2:20) Okoki kosɛnga mosala ya mobongisi-nzela mosungi na sanza oyo mokɛngɛli akotala lisangá na bino. Okoki kosɛnga ete obima na mokɛngɛli to mwasi na ye na mosala ya kosakola to okoki komema moko na bango epai ya moyekoli na yo ya Biblia? Basepelaka kosakola na basakoli ndenge na ndenge, ezala basakoli ya sika to baoyo bamesani mpenza te na mosala ya kosakola.

  • Zalá moyambi bapaya. Okoki kopesa bango esika ya kolala to mpe kobengisa bango mpo na kolya mwa eloko? Yango ekomonisa mokɛngɛli ya zongazonga ná mwasi na ye ete olingaka bango. Basɛngaka makambo ya mindɔndɔ te.​—Lk 10:38-42.

  • Yoká mpe salelá malako mpe toli oyo azali kopesa. Na bolingo nyonso, mokɛngɛli ya zongazonga asalisaka biso tómona ndenge oyo tokoki kobongisa mosala na biso mpo na Yehova. Na bantango mosusu, akoki kopesa toli ya makasi. (1Ko 5:1-5) Asepelaka soki tozali na botosi mpe na komikitisa.​—Ebr 13:17.

  • Monisá botɔndi. Yebisá mokɛngɛli ya zongazonga ná mwasi na ye ndenge milende na bango ememelaki yo matomba. Okoki koloba na bango na monɔkɔ to kokoma yango na mwa nɔti to karte.​—Kol 3:15.