Yona 4:1-11

  • Yona asiliki mpe alingi kaka akufa (1-3)

  • Yehova ateyi Yona motema mawa (4-11)

    • “Ebongi mpenza osilika makasi boye?” (4)

    • Yehova asaleli molona ya mbika mpo na koteya Yona (6-10)

4  Kasi yango esepelisaki Yona ata moke te, mpe asilikaki makasi.  Na yango, abondelaki Yehova boye: “Ee Yehova, nakanisaki likambo oyo ntango nazalaki na mboka na ngai. Yango wana liboso nalukaki kokima na Tarasisi;+ mpo nayebaki ete ozali Nzambe ya ngɔlu mpe ya motema mawa, oyokaka nkanda noki te mpe otondi na bolingo ya sembo,+ oyokaka mawa mpo na likama.  Bongo sikoyo, Ee Yehova, nabondeli yo, longolá bomoi* na ngai, mpo eleki malamu nakufa, na esika ya kozala na bomoi.”+  Yehova atunaki ye: “Ebongi mpenza osilika makasi boye?”  Bongo Yona abimaki na Ninive, akei kofanda na ɛsti ya engumba yango. Asalaki mwa ndako ya matiti kuna, mpe afandaki na nse ya elili na yango, mpo na kotala nini ekokómela engumba yango.+  Bongo Yehova Nzambe akolisaki molona moko ya mbika mpo ezipa Yona, epesa mwa mpiɔ likoló ya motó na ye, mpe ekitisa mpasi na ye. Mpe Yona asepelaki mingi na molona yango ya mbika.  Kasi na mokolo oyo elandaki, na kotana ya ntɔngɔ, Nzambe ya solo atindaki mosɔpi moko ebebisa molona wana ya mbika, mpe molona yango ekaukaki.  Ntango moi ebandaki kongala, Nzambe atindaki mpe mopɛpɛ moko ya molunge oyo eutaki na ɛsti, mpe moi ezalaki kobɛta Yona makasi na motó, bongo etikalaki moke akatswa. Azalaki se kosɛnga liwa* mpe azalaki koloba: “Eleki malamu nakufa, na esika ya kozala na bomoi.”+  Nzambe atunaki Yona boye: “Ebongi mpenza ete osilika makasi boye mpo na molona ya mbika?”+ Mpe ye ayanolaki: “Ebongi mpenza nasilika, nasiliki mpe nalingi kaka kokufa.” 10  Kasi Yehova alobaki na ye: “Yo oyokeli molona ya mbika mawa, oyo kutu omonelaki mpasi te, okolisaki mpe te; ekolaki na butu moko mpe ekufi na butu moko. 11  Bongo ngai, nasengeli te koyoka mawa mpo na Ninive engumba monene,+ oyo ezali na bato koleka 120 000 oyo bayebi kutu te kokesenisa mabe ná malamu,* ná ebele ya banyama na bango?”+

Maloba na nse

To, “molimo.”
To, “ete molimo na ye ekufa.”
To, “kokesenisa lobɔkɔ na bango ya mobali ná lobɔkɔ na bango ya mwasi.”