Yirimia 46:1-28
46 Talá oyo Yehova alobaki na mosakoli Yirimia mpo na bikólo:+
2 Mpo na Ezipito,+ na oyo etali limpinga ya basoda ya Farao Neko+ mokonzi ya Ezipito, oyo azalaki pene ya Ebale Efrate, oyo balongaki ye na Karakemishe, epai ya Nebukadenezare mokonzi ya Babilone na mbula ya minei ya bokonzi ya Yehoyakime+ mwana ya Yosiya, mokonzi ya Yuda:
3 “Bóbongisa banguba na bino ya mike* mpe ya minene,Mpe bópusana mpo na etumba.
4 Bókanga bampunda bansinga, mpe bómata, bino basoda oyo botambolaka na mpunda,
Bómibongisa mpe bólata bikɔti na bino.
Bóyeisa makɔnga na bino sɛlisɛli mpe bólata bakazaka ya bibende.
5 ‘Mpo na nini namoni bango bazali kolɛnga na nsɔmɔ?
Bazali kozonga nsima, babundi-bitumba na bango babukanibukani.
Bakimi na nsɔmɔ, babundi-bitumba na bango batali nsima te.
Kobanga ezali bipai nyonso,’ Yehova alobi bongo.
6 ‘Bato ya mbangu bakoki kokima te, mpe babundi-bitumba bakoki kobika te.
Na nɔrdi pembenipembeni ya Ebale Efrate,Babɛti libaku mpe bakwei.’+
7 Nani oyo azali komata lokola Ebale Nile,Lokola bibale oyo mai na yango ezali kotomboka?
8 Ezipito ezali komata lokola Ebale Nile,+Lokola bibale oyo mai na yango ezali kotomboka.Mpe ezali koloba: ‘Nakomata mpe nakozipa mabele.
Nakobebisa engumba mpe bafandi na yango nyonso.’
9 Bómata, bino bampunda!
Bótambola mbangu na ndenge ya ligboma, bino makalo!
Babundi-bitumba bápusana,Kushi ná Puti, baoyo bazali kosalela nguba,+Mpe Baludime,+ baoyo bazali kosalela mpe kogumba* litimbo.+
10 “Mokolo yango ezali ya Nkolo Mokonzi-Oyo-Aleki-Nyonso, Yehova ya mampinga, mokolo ya kozongisa mabe na banguna na ye. Mopanga ekolya, ekotonda mpe ekomɛla makila na bango, mpo Nkolo Mokonzi-Oyo-Aleki-Nyonso, Yehova ya mampinga, azali kobongisa mbeka na mokili ya nɔrdi pene ya Ebale Efrate.+
11 Matá na Gileade mpo ozwa balsame,+Ee ngɔndɔ mwana mwasi ya Ezipito.
Obakisi kaka mpamba bankisi ya kobikisa yo,Mpo nkisi ya kobikisa yo ezali te.+
12 Bikólo eyoki nsango ya kosambwa na yo,+Mpe mokili etondi na koganga na yo.
Mpo babɛti libaku, mobundi moko atutani na mobundi mosusu.Mpe bango nyonso mibale bakwei elongo.”
13 Talá oyo Yehova alobaki na mosakoli Yirimia na oyo etali koya ya Nebukadenezare mokonzi ya Babilone mpo na kobundisa mokili ya Ezipito:+
14 “Bóyebisa yango na Ezipito, bósakola yango na Migidole,+
Bósakola yango na Nofe* mpe na Tahapanehese.+
Bóloba ete: ‘Bótɛlɛma na bisika na bino mpe bómibongisa,Mpo mopanga ekolya zingazinga na bino nyonso.
15 Mpo na nini bato na bino ya nguya bakɔmbɔlami?
Batɛlɛmi te na esika na bango,Mpo Yehova atindiki bango.
16 Ebele bazali kobɛta mabaku mpe kokwea.
Bazali kolobana ete:
“Tɛlɛmá, tózonga epai ya bato na biso mpe na mokili na biso,Mpo na mopanga oyo ezali konyokola.”’
17 Kuna basakoli ete:‘Farao mokonzi ya Ezipito azali kosala makɛlɛlɛ ya mpambaAtiki libaku* eleka kaka boye.’+
18 Mokonzi oyo nkombo na ye ezali Yehova ya mampinga alobi boye: ‘Lokola nazali solo na bomoi,’Akoya* lokola Tabore+ katikati ya bangombaMpe lokola Karamele+ pembeni ya mbu.
19 Kangá bisaka na yo mpo na kokende na mboka mopaya,Ee mwana mwasi oyo azali kofanda na Ezipito.
Mpo Nofe* ekokóma eloko ya nsɔmɔ,Ekotyama mɔtɔ* mpe moto moko te akofanda kuna.+
20 Ezipito ezali lokola mwana-ngɔmbɛ ya mwasi ya kitoko,Kasi nzinzi oyo eswaka ekoyela ye uta na nɔrdi.
21 Ata basoda na ye ya kofutela oyo bazali na katikati na ye bazali lokola bana-ngɔmbɛ ya mafutamafuta,Kasi bango mpe bazongi nsima mpe bakimi elongo.
Batɛlɛmi te.+Mpo mokolo ya likama na bango eyeli bango,Ntango ya kopesa bango etumbu.’
22 ‘Mongongo na ye ezali lokola ya nyoka oyo ezali kokima,Mpo bazali koya nsima na ye na nguya ya bomoi, na bipasola,*Lokola bato oyo bazali kokata banzete.*
23 Bakokata zamba na ye,’ Yehova alobi bongo, ‘atako ezalaki komonana ete bato bakoki kokɔta kuna te.
Mpo bazali mingi koleka mayoyo,* bakoki kotángama te.
24 Mwana mwasi ya Ezipito akoyokisama nsɔni.
Akokabama na lobɔkɔ ya bato ya nɔrdi.’+
25 “Yehova ya mampinga, Nzambe ya Yisraele, alobi: ‘Nazali kolandela Amone+ nzambe ya No,*+ Farao, Ezipito, banzambe na ye+ mpe bakonzi na ye, ɛɛ, Farao mpe bato nyonso oyo bazali kotyela ye motema.’+
26 “‘Nakokaba bango na lobɔkɔ ya baoyo bazali koluka koboma bango,* mpe na lobɔkɔ ya Nebukadenezare mokonzi ya Babilone+ ná basaleli na ye. Kasi na nsima, akofanda epai na ye lokola na mikolo ya kala,’ Yehova alobi bongo.+
27 ‘Kasi yo, mosaleli na ngai Yakobo, kobanga te,Mpe kolɛnga na nsɔmɔ te, Ee Yisraele.+
Mpo nakobikisa yo uta na esika ya mosika epai ozaliMpe bana* na yo uta na mokili oyo bazali bakangami.+
Yakobo akozonga, akozala na kimya, mpe moto moko te akotungisa ye,Moto ata moko mpe te akobangisa bango.+
28 Na yango, kobanga te, mosaleli na ngai Yakobo,’ Yehova alobi bongo, ‘mpo nazali elongo na yo.
Nakosilisa bato nyonso kati na bikólo nyonso epai napalanganisaki yo,+Kasi nakosilisa yo te.+
Nakosembola yo na ndenge oyo ebongi,+Kasi nakozanga te kopesa yo etumbu.’”
Maloba na nse
^ Banguba ya mike, oyo mbala mingi babwaki-mbanzi bazalaki kosalela.
^ Lil., “konyata.”
^ To, “Memfisi.”
^ Lil., “ntango oyo etyamá.”
^ Elingi koloba, “Moto oyo akolonga Ezipito.”
^ To, “Memfisi.”
^ To mbala mosusu, “ekokóma mokili oyo etikalá mpamba.”
^ To, “basóka.”
^ To, “kolɔkɔta nkoni.”
^ Talá Ndimbola ya maloba.
^ Elingi koloba, “Thèbes.”
^ To, “baoyo bazali koluka molimo na bango.”
^ Lil., “momboto.”
