Nzembo 90:1-17
Libondeli ya Moize,moto ya Nzambe ya solo.+
90 Ee Yehova, ozali esika na biso ya kofanda*+ bileko na bileko.
2 Liboso bangomba ebotama,To obanda kobimisa* mokili mpe mabele oyo ebotaka,+Libela na libela, yo ozali Nzambe.+
3 Osalaka ete moto, mowei mpamba azonga putulu;Olobaka: “Bino bana ya bato, bózonga na putulu.”+
4 Mpo na miso na yo, mbula nkóto ezali kaka lokola mokolo ya lobi oyo eleki,+Lokola kaka ntango ya kokɛngɛla ya butu.
5 Okɔmbɔli bango;+ balimwe lokola ndɔtɔ;Na ntɔngɔ, bazali lokola matiti ya mobesu oyo ezali kobima.+
6 Na ntɔngɔ, ebimisaka fololo mpe ekómaka ya sika,Kasi na mpokwa, ebebaka mpe ekaukaka.+
7 Mpo nkanda na yo ezikisi biso+Mpe kosilika na yo ebangisi biso mpenza.
8 Oyebi mabunga na biso,+Na kongɛnga ya elongi na yo, makambo na biso ya kobombana ebimi polele.+
9 Mikolo na biso* ekómi pene na nsuka na yango mpo na nkanda na yo;Mpe bambula na biso ezali kolimwa lokola mwa mpema oyo ebimi na monɔkɔ.
10 Bomoi na biso eumelaka mbula 70,To mbula 80+ soki moto azali mpenza makasi.
Kasi etondi na mawa mpena mpasi;Elekaka nokinoki, mpe tokozala lisusu te.+
11 Nani ayebi nguya ya nkanda na yo?
Kobanga oyo tosengeli kobanga yo, ezali lokola nkanda na yo makasi.+
12 Teyá biso ndenge ya kotánga mikolo na biso+Mpo tókóma na motema ya bwanya.
13 Ee Yehova, zongá!+ Yango ekoumela tii ntango nini?+
Yokelá basaleli na yo mawa.+
14 Na ntɔngɔ, tondisá biso na bolingo na yo ya sembo,+Mpo tóganga na esengo mpe tósepela+ mikolo nyonso ya bomoi na biso.
15 Salá ete mikolo oyo okosepelisa biso ekokana na mikolo oyo omonisaki biso mpasi,+Ekokana na bambula oyo tomoni mpasi.+
16 Basaleli na yo bámona mosala na yo,Mpe bana na bango bámona nkembo na yo.+
17 Boboto ya Yehova Nzambe na biso ezala likoló na biso;Pambolá* mosala ya mabɔkɔ na biso.
Ɛɛ, pambolá mosala ya mabɔkɔ na biso.+
Maloba na nse
^ To mbala mosusu, “esika na biso ya kokima.”
^ To, “lokola na mpasi ya kobota.”
^ To, “Bomoi na biso.”
^ To, “Longisá.”
