Nzembo 42:1-11
Epai ya mokambi ya Nzembo. Maskile* ya bana ya Kora.+
42 Kaka ndenge nyama ebengami bishe ezalaka na mposa makasi ya mai,Ngai mpe nazali* na mposa na yo makasi, Ee Nzambe.
2 Nazali mpenza na mposa ya Nzambe, ya Nzambe ya bomoi.+
Ntango nini nakoki koya mpe komonana liboso ya Nzambe?+
3 Mai ya miso na ngai ekómi bilei na ngai butu moi;Mokolo mobimba bazali kotyola ngai ete: “Nzambe na yo azali wapi?”+
4 Nakanisi makambo oyo, mpe nasopi molimo na ngai,*Mpo namesanaki kotambola elongo na ebele ya bato;Nazalaki kotambola malɛmbɛ liboso na bango mpo na kokende na ndako ya Nzambe,Na koganga ya esengo mpe ya matɔndi,Ya ebele ya bato oyo bazali kosala fɛti.+
5 Mpo na nini nazangi elikya?+
Mpo na nini mobulungano oyo kati na ngai?
Nakozela Nzambe,+Mpo nakosanzola ye lisusu, azali Mobikisi na ngai monene.+
6 Nzambe na ngai, nazangi elikya.+
Yango wana nakanisi yo,+Banda na mokili ya Yordani mpe na bansɔngɛ ya Heremone,Banda na ngomba Mizare.*
7 Mai mozindo ezali kobenga mai mozindoNa lokito ya mai na yo oyo ezali komibwaka.
Mitungisi ezipi ngai lokola mbonge na yo ya makasi.+
8 Na moi Yehova akomonisela ngai bolingo na ye ya sembo,Mpe na butu loyembo na ye ekozala elongo na ngai—nakosala libondeli epai ya Nzambe ya bomoi na ngai.+
9 Nakoloba na Nzambe, libanga na ngai ete:
“Mpo na nini obosani ngai?+
Mpo na nini esengeli natambola mawamawa mpo monguna azali konyokola ngai?”+
10 Na koyina nyonso* banguna na ngai bazali kotyola ngai;Mokolo mobimba bazali kotyola ngai ete: “Nzambe na yo azali wapi?”+
11 Mpo na nini nazangi elikya?
Mpo na nini mobulungano oyo kati na ngai?
Nakozela Nzambe,+Mpo nakosanzola ye lisusu; azali Mobikisi na ngai monene mpe Nzambe na ngai.+
Maloba na nse
^ Talá Ndimbola ya maloba.
^ To, “Molimo na ngai ezali.”
^ Talá Ndimbola ya maloba.
^ To, “ngomba moke.”
^ To mbala mosusu, “Lokola bazali.”
