Mokanda ya liboso ya Ntango 17:1-27
17 Ntango kaka Davidi akómaki kofanda na ndako na ye,* alobaki na mosakoli Natane+ boye: “Talá, ngai nazali kofanda na ndako batongi na mabaya ya sɛdrɛ,+ nzokande sanduku ya kondimana ya Yehova ezali na kati ya hema.”+
2 Natane azongiseli Davidi ete: “Salá nyonso oyo ezali na motema na yo, mpo Nzambe ya solo azali elongo na yo.”
3 Kaka na butu yango, Nzambe alobaki na Natane ete:
4 “Kende koloba na mosaleli na ngai Davidi boye: ‘Talá oyo Yehova alobi: “Yo te moto okotongela ngai ndako oyo nakofanda.+
5 Mpo banda mokolo oyo nabimisaki Bayisraele na Ezipito tii na mokolo ya lelo, nafandá na ndako moko te. Kasi nazalaki se kokende hema na hema mpe tabernakle na tabernakle.*+
6 Ntango nyonso oyo natambolaki elongo na Yisraele mobimba, natunaki nde ata moko ya basambisi ya Yisraele, oyo natyaki mpo na kobatela bato na ngai, ete: ‘Mpo na nini otongeli ngai ndako ya mabaya ya sɛdrɛ te?’”’
7 “Sikoyo kende koloba boye na mosaleli na ngai Davidi, ‘Talá oyo Yehova ya mampinga alobi: “Nazwaki yo na esika ya koleisa bibwɛlɛ matiti, epai ozalaki kobatela etonga, mpo okóma mokambi ya bato na ngai Yisraele.+
8 Nakozala na yo esika nyonso oyo okokende,+ mpe nakolongola* banguna na yo nyonso;+ mpe nakokómisa nkombo na yo monene lokola nkombo ya bato minene oyo bazali na mabele.+
9 Nakopesa bato na ngai Yisraele esika mpe nakotya bango kuna. Bakofanda wana mpe eloko moko te ekoya kotungisa bango. Bato mabe bakonyokola* bango lisusu te, ndenge basalaki liboso,+
10 banda mokolo oyo natyaki basambisi mpo na bato na ngai Yisraele.+ Mpe nakokitisa banguna na yo nyonso.+ Lisusu, nayebisi yo boye: ‘Ngai Yehova nakobimisa molɔngɔ ya bakonzi na libota na yo.’*
11 “‘“Ntango okokóma na nsuka ya bomoi na yo mpe okokufa,* nakopona moto ya libota* na yo, moko ya bana na yo,+ mpo azala mokonzi nsima na yo, mpe nakokómisa bokonzi na ye makasi.+
12 Ye nde akotonga ndako mpo na ngai,+ mpe nakokómisa kiti ya bokonzi na ye makasi mpo na libela.+
13 Nakokóma tata na ye, mpe ye akokóma mwana na ngai.+ Nakolongola bolingo na ngai ya sembo epai na ye te+ ndenge nalongolaki yango epai ya moto oyo azalaki mokonzi liboso na yo.+
14 Nakotya ye na ndako na ngai mpe nakopesa ye bokonzi* mpo na libela.+ Kiti ya bokonzi na ye ekoumela mpo na libela.”’”+
15 Natane ayebisaki Davidi maloba wana nyonso mpe emonaneli yango mobimba.
16 Bongo Mokonzi Davidi akendaki kofanda na mabele liboso ya Yehova mpe alobaki: “Ee Yehova Nzambe, ngai nde nani? Mpe libota na ngai nde nini, mpo okómisa ngai ndenge nazali lelo?+
17 Mpe osuki wana te, Ee Nzambe, olobi makambo oyo okosalela libota* na ngai mosaleli na yo tii mosika na mikolo oyo ekoya,+ mpe otali ngai lokola nde nazalaki moto oyo abongi kozwa lisusu lokumu mingi,* Ee Yehova Nzambe.
18 Ngai mosaleli na yo Davidi nakoki koloba na yo lisusu nini mpo na lokumu oyo opesi ngai, lokola oyebi ngai malamu?+
19 Ee Yehova, mpo na mosaleli na yo mpe ndenge motema na yo elingi,* osali makambo minene wana nyonso na ndenge olakisi bonene na yo.+
20 Ee Yehova, mosusu lokola yo azali te,+ mpe Nzambe mosusu azali te, kaka yo.+ Nyonso oyo toyoká na matoi na biso emonisi ete ezali bongo.
21 Mpe awa na mabele, ekólo mosusu nini ezali lokola bato na yo Yisraele?+ Yo, Nzambe ya solo, okendaki kosikola bango mpo bázala bato na yo.+ Osalaki ete nkombo na yo eyebana na makambo minene mpe ya nsɔmɔ oyo osalaki,+ na ndenge obenganaki bikólo liboso ya bato na yo,+ oyo osikolaki na Ezipito.
22 Okómisaki Yisraele bato na yo moko mpo na libela;+ mpe yo, Ee Yehova, okómaki Nzambe na bango.+
23 Sikoyo, Ee Yehova, tiká ete elaka oyo opesi mpo na ngai mosaleli na yo mpe libota* na ngai ekokisama mpo na libela, mpe tiká ete osala kaka ndenge olaki.+
24 Tiká nkombo na yo eumela seko* mpe ekumisama+ libela na libela, mpo bato báloba ete: ‘Yehova ya mampinga, Nzambe ya Yisraele, azali Nzambe mpo na Yisraele,’ mpe tiká libota* ya mosaleli na yo Davidi epikama makasi liboso na yo.+
25 Mpo yo, Nzambe na ngai, nde oyebisi ngai mosaleli na yo mokano na yo ya kobimisa bakonzi na libota na ngai.* Yango wana ngai mosaleli na yo nazwi mpiko ya kosala libondeli oyo.
26 Mpe sikoyo, Ee Yehova, ozali Nzambe ya solo, mpe olaki makambo wana ya malamu mpo na mosaleli na yo.
27 Boye, tiká ete osepela kopambola libota* ya mosaleli na yo, mpe tiká ete eumela libela na libela liboso na yo; mpo yo, Ee Yehova, opamboli yango, mpe epambolami mpo na libela.”
Maloba na nse
^ To, “ndako ya mokonzi.”
^ Mbala mosusu elimboli, “longwa na esika oyo, epai batye hema mpe kende na mosusu, mpe longwa na esika oyo ya kofanda mpe kende na mosusu.”
^ Lil., “nakokata liboso na yo.”
^ Lil., “bakolɛmbisa.”
^ Lit., “Nakotonga ndako mpo na yo.”
^ Lil., “okokende kozala esika moko na bankɔkɔ na yo.”
^ Lil., “momboto.”
^ Lil., “bokonzi na ngai.”
^ Lil., “ndako.”
^ To, “moto monene mpenza.”
^ To, “na boyokani na mokano na yo.”
^ Lil., “ndako.”
^ To, “ezala sembo.”
^ Lil. “ndako.”
^ Lil., “kotongela ye ndako.”
^ Lil., “ndako.”
