Yisaya 2:1-22
2 Likambo oyo Yisaya mwana ya Amoze amonaki na emonaneli mpo na Yuda mpe Yerusaleme:+
2 Mpe ekosalema mpenza boye na eleko ya nsuka ya mikolo:+ ngomba ya ndako+ ya Yehova ekopikama makasi likoló koleka nsɔngɛ ya bangomba,+ mpe ekotombwama mpenza likoló koleka bangomba mike;+ mpe bikólo nyonso ekosopana kuna.+
3 Mpe bato mingi ya bikólo bakokende mpenza mpe bakoloba ete: “Bóya,+ tómata na ngomba ya Yehova, na ndako ya Nzambe ya Yakobo; mpe akolakisa biso banzela na ye, mpe tokotambola na banzela na ye.”+ Mpo mobeko ekobima na Siona, mpe liloba ya Yehova na Yerusaleme.+
4 Mpe akokata mpenza makambo na kati ya bikólo,+ mpe akosembola makambo+ etali bato mingi ya bikólo.+ Mpe bakotula mipanga na bango mpo ekóma bitimweli ya mabele mpe makɔnga na bango mpo ekóma makwangola ya kokata matiti.+ Ekólo moko ekotombola mopanga te mpo na kobunda na ekólo mosusu, bakoyekola mpe etumba lisusu te.+
5 Ee bato ya ndako ya Yakobo, bóya, tótambola na pole ya Yehova.+
6 Mpo osundoli bato na yo, ndako ya Yakobo.+ Mpo batondi na makambo oyo euti na Ɛsti,+ mpe bazali bato ya misala ya maji+ lokola Bafilistia, mpe batondi na bana ya bapaya.+
7 Mokili na bango etondi na palata ná wolo, mpe biloko na bango ya motuya ezali na nsuka te.+ Mokili na bango etondi na bampunda, mpe makalo na bango ezali na nsuka te.+
8 Mokili na bango etondi na banzambe ya mpambampamba.+ Bazali kogumbamela misala ya moto, eloko oyo misapi ya moto esali.+
9 Mpe moto ya mabele azali kogumbama, mpe moto azali kokita na nse, mpe okoki kolimbisa bango te.+
10 Kɔtá na libanga mpe bombaná na putulu mpo na nsɔmɔ ya Yehova, mpe mosika na nkembo ya bonene na ye.+
11 Miso ya lolendo ya moto ya mabele ekokita mpenza na nse, mpe lofundo ya bato ekogumbama;+ mpe Yehova ye moko akotombwama mpenza na mokolo yango.+
12 Mpo ezali mokolo ya Yehova ya mampinga.+ Ekoyela moto nyonso oyo azali komikumisa mpe komitombola ná moto nyonso oyo atombwami to oyo akitisami;+
13 ná banzete nyonso ya sɛdrɛ ya Libá+ oyo ezali molai mpe etombwaná ná banzete minene nyonso ya Bashane;+
14 ná bangomba nyonso ya milai ná bangomba mike nyonso oyo etombwaná;+
15 ná linɔ́ngi nyonso ya molai ná efelo nyonso oyo ebatelami makasi;+
16 ná bamasuwa nyonso ya Tarasisi+ ná bamasuwa nyonso ya kitoko.
17 Lolendo ya moto ya mabele ekogumbama mpenza, mpe lofundo ya bato ekokita mpenza na nse;+ mpe Yehova ye moko akotombwama mpenza na mokolo yango.+
18 Mpe banzambe ya mpambampamba bakosila mpenza.+
19 Mpe bato bakokɔta na mobenga ya mabanga mpe na mabulu ya putulu mpo na nsɔmɔ ya Yehova, mosika na nkembo ya bonene na ye,+ ntango akotɛlɛma mpo mabele elɛnga.+
20 Na mokolo yango, moto ya mabele akobwakela milumbanzɛnzɛ mpe bangembo banzambe na ye ya palata oyo ezangá ntina mpe banzambe na ye ya wolo ya mpambampamba oyo basalaki mpo afukamela yango,+
21 mpo na kokɔta na madusu ya mabanga mpe na minkaka ya mabanga minene, mpo na nsɔmɔ ya Yehova, mosika na nkembo ya bonene na ye,+ ntango akotɛlɛma mpo mabele elɛnga.
22 Mpo na bolamu na bino moko, bózala mosika na moto ya mabele, oyo mpema na ye ezali na zolo na ye,+ mpo bakotánga ye mpo na nini?+
