Mika 5:1-15
5 “Na ntango ozali komikatakata nzoto,+ Ee mwana mwasi oyo bakɔteli; ye azingeli biso mpo na kobundisa biso.+ Na lingenda, bakobɛta mosambisi ya Yisraele na litama.+
2 “Mpe yo, Ee Beteleme Efrata,+ yo oyo ozali moke mpenza mpo okoka kotángama na kati ya bankóto ya Yuda,+ uta na yo+ moto moko akobima mpo na ngai, oyo akokóma mokonzi na Yisraele,+ oyo ebandeli na ye ezali uta kalakala, uta ntango oyo etyami ndelo te.+
3 “Yango wana, akosundola bango+ tii ntango ye oyo azali kobota akobota mpenza.+ Mpe bandeko na ye oyo batikali bakozonga epai ya bana ya Yisraele.
4 “Mpe akotɛlɛma mpenza mpe akoleisa etonga na makasi ya Yehova,+ na bonene ya nkombo ya Yehova Nzambe na ye.+ Mpe bakokoba kofanda mpenza,+ mpo sikoyo akozala monene tii na bandelo ya nsuka ya mabele.+
5 Mpe moto yango nde akozala kimya.+ Nzokande moasiri, ntango akoya na mokili na biso mpe ntango akonyata bandako milai na biso ya kofanda,+ tokobimisela ye babateli ya mpate nsambo, ɛɛ, bankumu mwambe na kati ya bato.
6 Mpe bakokamba mpenza mokili ya Asiri na mopanga,+ mpe mokili ya Nimerode+ na bisika na yango ya kokɔta. Mpe akosikola mpenza biso na mabɔkɔ ya moto ya Asiri,+ ntango akoya na mokili na biso mpe ntango akonyata teritware na biso.
7 “Mpe bato ya Yakobo oyo batikali+ bakokóma na kati ya ebele ya bato ya bikólo lokola mamwɛ oyo euti epai ya Yehova,+ lokola mbula monene likoló ya milona,+ oyo etalelaka moto te mpe ezelaka te bana ya moto ya mabele.+
8 Mpe bato ya Yakobo oyo batikali bakokóma na kati ya bikólo, na kati ya ebele ya bato ya bikólo, lokola nkɔsi na kati ya banyama ya zamba, lokola mwana-nkɔsi oyo nkingo etondi na nsuki na kati ya bitonga ya bampate, oyo, ntango ezali mpenza koleka, enyataka mpe epasolaka mpenza;+ mpe mobikisi azali te.
9 Lobɔkɔ na yo ekozala mpenza likoló ya batɛmɛli na yo,+ mpe banguna na yo nyonso bakolongolama.”+
10 “Mpe ekosalema boye na mokolo yango,” yango nde liloba ya Yehova, “nakolongola bampunda na yo na kati na yo mpe nakobebisa makalo na yo.+
11 Mpe nakolongola bingumba ya mokili na yo mpe nakokweisa bisika na yo nyonso oyo ebatelami makasi.+
12 Mpe nakolongola misala ya bonganga-nkisi na lobɔkɔ na yo, mpe okozala lisusu na bato ya misala ya maji te.+
13 Mpe nakolongola bikeko na yo oyo eyemami ná makonzí na yo na kati na yo, mpe okofukamela lisusu te eloko oyo osali na mabɔkɔ na yo.+
14 Mpe nakopikola banzete na yo ya losambo+ na kati na yo mpe nakosilisa bingumba na yo nyɛɛ.
15 Mpe na nkanda mpe na nkɛlɛ nakozongisa mabe likoló ya bikólo oyo etosi te.”+
