Masese 20:1-30
20 Vinyo ezali mosɛki,+ masanga oyo elangwisaka ezali na makambo mobulumobulu,+ mpe moto nyonso oyo azali kotika yango ebungisa ye azali na bwanya te.+
2 Nsɔmɔ oyo mokonzi apesaka ezali konguluma lokola oyo ya mwana-nkɔsi oyo nkingo etondi na nsuki.+ Ye oyo azali komibendela nkanda na ye azali kosalela molimo na ye moko lisumu.+
3 Ezali nkembo epai ya moto ete akima kowelana,+ kasi moto nyonso oyo azali zoba akomikɔtisa wana.+
4 Mpo na eleko ya mpiɔ moto ya gɔigɔi akobalola mabele te;+ akosɛngasɛnga na ntango ya kobuka mbuma, kasi eloko moko ekozala te.+
5 Makanisi na motema ya moto ezali lokola mai mozindo,+ kasi moto ya bososoli nde akotoka yango.+
6 Ebele ya bato bakosakola moto na moto motema boboto na ye,+ kasi moto ya sembo, nani akoki kozwa ye?+
7 Moyengebene azali kotambola na ezaleli na ye ya kozanga mbeba.+ Esengo na bana na ye nsima na ye.+
8 Mokonzi afandi na kiti ya kosambisa,+ azali kopanza mabe nyonso na miso na ye.+
9 Nani akoki koloba: “Napɛtoli motema na ngai;+ nakómi pɛto, nalongwe na lisumu na ngai”?+
10 Mitindo mibale ya kilo mpe mitindo mibale ya efa+—yango nyonso mibale ezali eloko moko oyo Yehova ayiná.+
11 Ata na misala na ye mwana mobali asalaka ete bato báyeba ye, soki mosala na ye ezali pɛto mpe elongobani.+
12 Litoi oyo ezali koyoka mpe liso oyo ezali komona—Yehova ye moko nde asalá yango nyonso mibale.+
13 Kolinga mpɔngi te, noki okóma na bobola.+ Fungolá miso na yo; tondá na limpa.+
14 “Ezali mabe, mabe!” mosombi alobi bongo, mpe akei.+ Nsima na yango nde azali komikumisa.+
15 Wolo ezali, mabanga kitoko ya korai mpe ezali beboo; kasi mbɛbu ya boyebi ezali bambɛki ya motuya.+
16 Soki moto amipesi ndanga mpo na mopaya, kamatá elamba na ye;+ mpe soki ezali mpo ayokani na mwasi mopaya, simbá ndanga epai na ye.+
17 Limpa oyo ezwami na lokuta ezali elɛngi epai ya moto,+ kasi nsima na yango, monɔkɔ na ye ekotonda na mabanga mikemike.+
18 Myango epikamaka makasi na toli,+ mpe salá etumba na yo na likoki ya koyeba kotambwisa makambo.+
19 Moto oyo azali kolekaleka mpo na kokosela bato makambo abimisaka makambo oyo elobami na nkuku;+ mpe osengeli te kosala boninga na moto oyo alengolami na mbɛbu na ye.+
20 Ye oyo azali kolakela tata na ye ná mama na ye mabe,+ mwinda na ye ekobomama wana molili ekómi pene.+
21 Libula ezwamaka na lokoso na ebandeli,+ kasi nsuka na yango ekopambolama te.+
22 Koloba te ete: “Nakozongisa mabe!”+ Tyá elikya epai ya Yehova,+ mpe akobikisa yo.+
23 Mitindo mibale ya kilo ezali eloko moko oyo Yehova ayiná,+ mpe emekeli-kilo ya bokosi ezali malamu te.+
24 Matambe ya mobali makasi eutaka na Yehova.+ Kasi moto ya mabele, ndenge nini akoki kososola nzela na ye?+
25 Ezali motambo ntango moto ya mabele abeleli mbangumbangu ete: “Mosantu!”+ bongo nsima ya kosala bilako+ alingi kotalela yango malamu.+
26 Mokonzi ya bwanya azali kopanza bato mabe,+ mpe abalusaka yiká likoló na bango.+
27 Mpema+ ya moto ya mabele ezali mwinda ya Yehova, elukalukaka biteni nyonso ya kati ya libumu.+
28 Motema boboto ná bosolo—yango ebatelaka mokonzi;+ mpe na motema boboto, alendisi kiti na ye ya bokonzi.+
29 Kitoko ya bilenge ezali nguya na bango,+ mpe nkembo ya mibange ezali nsuki mpɛmbɛ na bango.+
30 Bampota oyo euti na kobɛtama nde esukolaka mabe;+ mpe kobɛtama, yango nde esukolaka biteni ya kati ya libumu.+
