Baroma 15:1-33
15 Nzokande, biso baoyo tozali makasi tosengeli komema bolɛmbu ya baoyo bazali makasi te,+ mpe tómisepelisa biso moko te.+
2 Moto na moto na kati na biso asepelisa mozalani na ye na oyo ezali malamu mpo alendisa ye.+
3 Mpo Kristo kutu amisepelisaki te;+ kasi kaka ndenge ekomamá: “Kosambwisa ya bato oyo bazalaki kosambwisa yo ekweli ngai.”+
4 Mpo makambo nyonso oyo ekomamaki kala ekomamaki+ mpo eteya biso,+ mpo, na ezaleli na biso ya koyika mpiko+ mpe na libɔndisi+ oyo euti na Makomami, tózala na elikya.+
5 Sikoyo Nzambe oyo apesaka ezaleli ya koyika mpiko mpe libɔndisi asala ete na kati na bino bózala na makanisi+ lokola oyo Kristo Yesu azalaki na yango,
6 mpo, na bomoko+ mpe na monɔkɔ moko, bókumisa Nzambe mpe Tata ya Nkolo na biso Yesu Kristo.
7 Yango wana, bóyambanaka+ ndenge Kristo mpe ayambaki biso,+ mpo na nkembo ya Nzambe.
8 Mpo nazali koloba ete Kristo akómaki mpenza mosaleli+ ya baoyo bakatamá ngenga+ mpo na komonisa ete Nzambe azali na bosolo+ mpe kondimisa bilaka+ oyo Ye apesaki bankɔkɔ na bango,
9 mpe mpo bikólo+ mosusu bákumisa Nzambe mpo na motema mawa+ na ye. Kaka ndenge ekomamá: “Yango wana nakondima yo polele kati na bikólo mpe nakobɛtɛla nkombo na yo mondule.”+
10 Mpe alobi lisusu ete: “Bósepela, bino bikólo, elongo na bato na ye.”+
11 Mpe lisusu: “Bósanzola Yehova, bino bikólo nyonso, mpe bato ya mikili nyonso básanzola ye.”+
12 Mpe lisusu Yisaya alobi: “Mosisa ya Yese akozala,+ mpe moto oyo akobima mpo na koyangela bikólo akozala;+ bikólo bakotyela ye elikya na bango.”+
13 Nzambe oyo apesaka elikya atondisa bino na esengo mpe na kimya nyonso na kondima na bino, mpo bótonda na elikya na nguya ya elimo santu.+
14 Sikoyo bandeko na ngai, ngai moko mpe nandimi ete bino botondi mpe na bolamu, mpo botondi na boyebi nyonso,+ mpe ete bokoki kokebisana.+
15 Nzokande, nazali kokomela bino polelepolele mwa makambo mosusu, lokola nde nazali kokundwela+ bino yango lisusu, mpo na boboto monene oyo Nzambe amoniselaki ngai+
16 mpo nazala mosaleli ya Kristo Yesu epai ya bikólo+ mpo na bolamu na bango nyonso, namikɔtisa na mosala mosantu ya nsango malamu+ ya Nzambe, mpo likabo,+ elingi koloba, bikólo wana, bándimama,+ básantisama na elimo santu.+
17 Yango wana, nasengeli komikumisa mpo na Kristo Yesu+ na makambo ya Nzambe.+
18 Mpo nakomeka kutu te kolobela ata likambo moko longola makambo oyo Kristo asalaki na nzela na ngai+ mpo bikólo bátosa,+ na nzela ya liloba+ na ngai mpe na mosala na ngai,
19 na nguya ya bilembo mpe makamwisi oyo ezali komonisa makambo oyo ekoya,+ na nguya ya elimo santu; yango wana banda na Yerusaleme tii+ na Ilirikume nasakoli malamumalamu mpenza nsango malamu ya Kristo.+
20 Ɛɛ, na ndenge yango nde nazwaki mokano ya kosakola te nsango malamu esika bato bayoká nkombo ya Kristo, noki natonga likoló ya moboko ya moto mosusu;+
21 kasi, kaka ndenge ekomamá: “Baoyo eloko na ye ata moko te esakolamá epai na bango bakomona, mpe baoyo bayoki te bakokanga ntina.”+
22 Ezali lisusu mpo na yango nde mbala mingi nazwaki nzela ya kokóma epai na bino te.+
23 Kasi sikoyo lokola na bitúká oyo, nazali lisusu te na teritware epai mosala esalemi naino te mpe lokola uta mwa bambula nazali na mposa makasi ya kokóma epai na bino+
24 ntango nakokende na Espanye,+ nazali kolikya, libosoliboso, ntango nakozala na mobembo ya kokende kuna, natala bino mpe bókende kotika ngai+ na nzela nsima ya kotonda ata mwa moke na esengo ya kozala elongo na bino.
25 Kasi sikoyo nalingi nakende na Yerusaleme mpo nasalela basantu.+
26 Mpo baoyo bazali na Masedonia mpe na Akaya+ basepeli kopesa biloko na bango likabo+ epai ya babola oyo bazali na kati ya basantu oyo bazali na Yerusaleme.
27 Ya solo, basepeli kosala bongo, kasi bazalaki na nyongo ya basantu oyo bazali na Yerusaleme; mpo soki bikólo bazwi mpe biloko ya elimo ya baoyo wana,+ bikólo yango bazali mpe na nyongo ya kosalela bango nyonso na biloko oyo nzoto esengeli na yango.+
28 Bongo ntango nakosilisa kosala yango mpe kokómisela bango mbuma+ yango na ndenge esengeli mpenza, nakoleka epai na bino ntango nakokende na Espanye.+
29 Lisusu, nayebi ete ntango nakoya epai na bino nakoya na ebele ya mapamboli ya Kristo.+
30 Bandeko, sikoyo nazali kolendisa bino na nzela ya Nkolo na biso Yesu Kristo mpe na bolingo ya elimo,+ ete bóboma nzoto elongo na ngai na mabondeli epai ya Nzambe mpo na ngai,+
31 mpo bato oyo bazali na kondima te oyo bazali na Yudea básala ngai mabe te+ mpe basantu+ oyo bazali na Yerusaleme+ bándima mosala oyo nakosalela bango,
32 bongo ntango nakokóma epai na bino soki ezali mokano ya Nzambe nalendisama+ elongo na bino.
33 Nzambe oyo apesaka kimya azala na bino nyonso.+ Amen.
