Baefese 1:1-23
1 Paulo, ntoma+ ya Kristo Yesu na mokano ya Nzambe,+ epai ya basantu oyo bazali na Efese mpe bato ya sembo+ oyo bazali na bomoko+ elongo na Kristo Yesu:
2 Boboto monene+ mpe kimya+ ya Nzambe Tata na biso mpe ya Nkolo Yesu Kristo ezala na bino.
3 Nzambe mpe Tata ya Nkolo na biso Yesu Kristo apambwama,+ mpo apamboli biso+ na lipamboli nyonso ya elimo na bisika ya likoló+ na bomoko elongo na Kristo,
4 ndenge mpe aponaki+ biso na bomoko elongo na ye liboso ya ebandeli+ ya mokili, mpo tózala basantu mpe tózanga mbeba+ liboso na ye na kati ya bolingo.+
5 Mpo akanaki liboso+ ete akokamata biso mpe akokómisa+ biso bana+ na ye na nzela ya Yesu Kristo, ndenge mokano na ye elingi,+
6 mpo básanzola+ ye mpo na boboto monene na ye+ ya nkembo oyo amoniselaki biso na boboto mpenza na nzela ya Mwana na ye ya bolingo.+
7 Mpo na ye tosikolami na nzela ya lisiko na makila+ ya moto wana, ɛɛ, tolimbisami+ mabunga na biso, na kolanda bomɛngo ya boboto monene na ye.+
8 Atondisaki biso yango mingi na bwanya nyonso+ mpe na mayele,
9 na ndenge ayebisaki biso sekele mosantu+ ya mokano na ye. Yango eyokani na makambo oyo asepelaki kosala na kolanda mokano na ye+
10 mpo na mosala ya kotambwisa makambo+ na nsuka mpenza ya bantango oyo etyamá,+ elingi koloba, koyanganisa+ lisusu biloko nyonso esika moko na nse ya bokonzi ya Kristo,+ biloko oyo ezali na likoló+ mpe biloko oyo ezali na mabele.+ Ɛɛ, na nse ya bokonzi na ye,
11 oyo na bomoko elongo na ye totyamaki mpe bazwi-ya-libula,+ na ndenge bakanaki yango liboso mpo na biso na kolanda mokano ya moto oyo azali kosala makambo nyonso ndenge mokano na ye elakisi,+
12 mpo tózala ntina ya kosanzola mpe ya kopesa ye nkembo,+ biso baoyo tozali bato ya liboso oyo totyaki elikya na Kristo.+
13 Kasi bino mpe botyaki elikya epai na ye nsima ya koyoka liloba ya solo,+ nsango malamu oyo etali lobiko na bino.+ Na nzela na ye mpe, nsima ya kondima, botyamaki elembo+ na elimo santu+ oyo elakamaki,
14 oyo ezali ndanga+ ya libula+ na biso oyo epesami libelalibela, mpo na kosikola na nzela ya lisiko+ eloko ya Nzambe ye moko,+ mpo na kosanzola nkembo na ye.
15 Yango wana ngai mpe, banda nayoká nsango ya kondima oyo bozali na yango na Nkolo Yesu mpe epai ya basantu nyonso,+
16 natikaka te kopesa matɔndi mpo na bino. Nazali kokoba kotánga bino na mabondeli na ngai,+
17 mpo Nzambe ya Nkolo na biso Yesu Kristo, Tata ya nkembo, apesa bino elimo moko ya bwanya+ mpe ya emoniseli na boyebi ya solosolo ya koyeba ye;+
18 lokola miso+ ya motema na bino engɛngisami,+ mpo bóyeba mpenza elikya+ oyo ye abengelaki bino, bomɛngo ya nkembo+ oyo ye abombi mpo ezala libula ya basantu,+
19 mpe bonene ya nguya+ na ye oyo eleki nyonso epai na biso bandimi. Yango emonani na mosala+ ya nguya na ye monene,
20 oyo asalaki na yango na likambo ya Kristo ntango alamwisaki ye uta na bakufi+ mpe afandisaki ye na lobɔkɔ na ye ya mobali+ na kati ya bisika ya likoló,+
21 mosika mpenza koleka guvɛrnema nyonso mpe bokonzi mpe nguya mpe bonkolo+ mpe nkombo nyonso oyo epesami,+ kaka na ntango oyo te,+ kasi mpe na oyo ezali koya.+
22 Atyaki mpe biloko nyonso na nse ya makolo na ye,+ mpe akómisaki ye mokonzi ya biloko nyonso+ oyo etali lisangá,
23 oyo ezali nzoto na ye,+ oyo etondi+ na nzela ya moto oyo atondisaka biloko nyonso na kati ya nyonso.+
