Mitángo 13:1-33
13 Sikoyo Yehova alobaki na Moize ete:
2 “Tindá mibali bákende konɔngɛla yo mokili ya Kanana, oyo nazali kopesa bana ya Yisraele.+ Bokotinda mobali moko na libota mokomoko ya batata na ye, mokomoko azala nkumu+ na kati na bango.”
3 Bongo Moize atindaki bango longwa na esobe ya Parane+ na etinda ya Yehova. Mibali yango nyonso bazalaki bankumu ya bana ya Yisraele.
4 Mpe nkombo na bango, yango oyo: Na libota ya Rubene, Shamua mwana ya Zakure;
5 na libota ya Simeone, Shafate mwana ya Hori;
6 na libota ya Yuda, Kalebe+ mwana ya Yefune;
7 na libota ya Isakare, Yigale mwana ya Yozefe;
8 na libota ya Efraime, Hoshea+ mwana ya Nunu;
9 na libota ya Benyamina, Palati mwana ya Rafu;
10 na libota ya Zebulone, Gadiele mwana ya Sodi;
11 na libota ya Yozefe,+ mpo na libota ya Manase,+ Gadi mwana ya Susi;
12 na libota ya Dani, Amiele mwana ya Gemali;
13 na libota ya Ashere, Seture mwana ya Mikaele;
14 na libota ya Nafatali, Nahebi mwana ya Vofisi;
15 na libota ya Gade, Guele mwana ya Maki.
16 Wana ezali nkombo ya mibali oyo Moize atindaki mpo na konɔnga mokili. Mpe Moize azalaki kobenga Hoshea mwana ya Nunu Yehoshua.+
17 Ntango Moize atindaki bango mpo na konɔnga mokili ya Kanana, alobaki na bango ete: “Bómata awa tii bókɔta na Negebe,+ mpe bosengeli komata tii bókɔta na etúká ya ngombangomba.+
18 Mpe bosengeli kotala ndenge mokili yango ezali+ mpe bato oyo bazali kofanda kuna, soki bazali makasi to makasi te, soki bazali moke to mingi;
19 mpe ndenge mokili oyo bazali kofanda ezali, soki ezali malamu to mabe, mpe ndenge bingumba oyo bazali kofanda ezali, soki ezali na bakaa to na mapango ya makasi;
20 mpe ndenge mokili yango ezali, soki ezali na mabele ya malamu to ya malamu te,+ soki ezali na banzete to te. Mpe bosengeli kozala na mpiko+ mpe kozwa mwa ndambo ya mbuma ya mokili yango.” Nzokande, mikolo yango ezalaki mikolo oyo mbuma ya liboso ya vinyo etelaki.+
21 Bongo bamataki mpe banɔngaki mokili yango longwa na esobe ya Zine+ tii na Rehobe,+ na esika ya kokɔta na Hamate.+
22 Ntango bamataki tii bakɔti na Negebe,+ bakómaki tii na Hebrone.+ Sikoyo Ahimane, Sheshai ná Talamai,+ baoyo Anake+ abotaki, bazalaki kuna. Nzokande, Hebrone+ etongamaki mbula nsambo liboso ya Zoane+ ya Ezipito.
23 Ntango bakómaki na lobwaku ya mokɛli ya Eshikole,+ kuna bakataki etape ya etuka moko ya mbuma ya vinyo.+ Mpe mibali mibale na kati ya mibali yango bamemaki yango na nzete, ná mwa ndambo ya bagrenade+ mpe mwa ndambo ya mbuma ya figi.
24 Babengaki esika yango lobwaku ya mokɛli ya Eshikole,+ mpo na etuka yango oyo bana ya Yisraele bakataki kuna.
25 Nsukansuka, nsima ya mikolo ntuku minei (40),+ bazongaki nsima ya konɔnga mokili yango.
26 Bongo batambolaki mpe bakómaki epai ya Moize ná Arona mpe liyangani mobimba ya bana ya Yisraele na esobe ya Parane, na Kadeshe.+ Mpe bamemelaki bango ná liyangani mobimba maloba mpe balakisaki bango mbuma ya mokili yango.
27 Mpe bapesaki ye nsango mpe balobaki ete: “Tokɔtaki na mokili oyo otindaki biso, mpe yango etondi mpenza na miliki mpe na mafuta ya nzoi,+ mpe talá mbuma na yango.+
28 Kasi, likambo moko kaka: bato oyo bazali kofanda na mokili yango bazali makasi, mpe bingumba oyo ebatelami makasi ezali minene mpenza;+ mpe lisusu, kuna tomonaki baoyo Anake abotaki.+
29 Baamaleke+ bazali kofanda na mokili ya Negebe,+ mpe Bahiti ná Bayebusi+ mpe Baamore+ bazali kofanda na etúká ya ngombangomba, mpe Bakanana+ bazali kofanda pembeni ya mbu mpe pembenipembeni ya Yordani.”
30 Bongo Kalebe+ amekaki kokitisa bato motema liboso ya Moize mpe alobaki ete: “Tómata noki, mpe tokozwa mpenza yango, mpamba te tokoki mpenza kolonga yango.”+
31 Kasi mibali oyo bamataki elongo na ye balobaki ete: “Biso tokokoka te komata mpo na kobunda na bato yango, mpo baleki biso na makasi.”+
32 Mpe bazalaki kaka kopesa bana ya Yisraele nsango+ ya mabe mpo na mokili oyo banɔngaki, na maloba oyo: “Mokili oyo tolekaki na kati na yango mpo na konɔnga yango ezali mokili moko oyo elyaka bato oyo bafandi kuna; mpe bato nyonso oyo tomonaki na kati na yango bazali mibali ya mbinga na ndenge moko ya kokamwa.+
33 Mpe kuna tomonaki Banefilime, bana ya Anake,+ oyo bauti na Banefilime; bongo na miso na biso moko tomimonaki lokola makɔnkɔ, mpe ndenge yango nde tomonanaki na miso na bango.”+
