2 Samwele 8:1-18
8 Mpe na nsima, esalemaki boye: Davidi alongaki Bafilistia+ mpe atyaki bango na nse ya bokonzi na ye,+ mpe Davidi azwaki Metege-ama na lobɔkɔ ya Bafilistia.
2 Alongaki lisusu Bamoabe+ mpe amekaki bolai ya molɔngɔ na bango na nsinga moko; alalisaki bango na mabele, mpo ameka bolai ya nsinga mbala mibale mpo na koboma bango, kasi bolai ya nsinga moko mpo na kotika bango na bomoi;+ bongo Bamoabe bakómaki basaleli+ ya Davidi mpo báyelaka ye mpako na bango.+
3 Mpe lisusu Davidi alongaki Hadadezere+ mwana ya Rehobe mokonzi ya Soba,+ ntango azalaki kokende na ebale Efrate+ kozwa makasi mpo na bokonzi na ye.
4 Bongo Davidi akangaki basoda na ye nkóto moko na nkama nsambo (1 700) oyo batambolaka na mpunda mpe basoda nkóto ntuku mibale (20 000) oyo batambolaka na makolo;+ mpe Davidi akataki misisa ya nsima ya mabɔlɔngɔ ya makolo ya nsima+ ya bampunda nyonso ya makalo,+ kasi atikaki kati na yango bampunda nkama moko (100) ya makalo.
5 Ntango Siri ya Damasi+ eyaki kosalisa Hadadezere mokonzi ya Soba, Davidi abomaki mibali nkóto ntuku mibale na mibale (22 000) kati na bato ya Siri.+
6 Lisusu, Davidi atyaki bituluku ya basoda+ na Siri ya Damasi; mpe bato ya Siri bakómaki basaleli ya Davidi mpo báyelaka ye mpako na bango.+ Mpe Yehova azalaki se kobikisa Davidi esika nyonso oyo azalaki kokende.+
7 Longola wana, Davidi azwaki banguba ya zolongano+ ya wolo, oyo ezalaki epai ya basaleli ya Hadadezere mpe ayaki na yango na Yerusaleme.
8 Mpe Mokonzi Davidi azwaki mpenza ebele ya motako+ na Beta mpe na Berotai, bingumba ya Hadadezere.
9 Nzokande Toi mokonzi ya Hamate+ ayokaki ete Davidi abomi limpinga nyonso ya basoda ya Hadadezere.+
10 Bongo Toi atindelaki Mokonzi Davidi mwana na ye Yorame mpo na kotuna ye soki azali malamu+ mpe kopesa ye longonya mpo abundaki na Hadadezere mpe alongaki ye (mpamba te Hadadezere azalaki kobunda mbala na mbala na Toi); mpe na lobɔkɔ na ye, biloko ya palata mpe biloko ya wolo mpe biloko ya motako+ ezalaki.
11 Mokonzi Davidi asantiselaki mpe Yehova biloko yango, esika moko na palata mpe wolo oyo asantisaki, oyo eutaki na bikólo nyonso oyo atyaki na nse ya bokonzi na ye:+
12 na Siri, na Moabe,+ na bana ya Amone, na Bafilistia,+ na Amaleke+ mpe na biloko oyo apunzaki epai ya Hadadezere mwana ya Rehobe mokonzi ya Soba.+
13 Mpe Davidi amisalelaki nkombo ya lokumu ntango autaki koboma Baedome na Lobwaku ya Mungwa,+ bato nkóto zomi na mwambe (18 000).+
14 Mpe atyaki bituluku ya basoda na Edome.+ Na Edome mobimba, atyaki bituluku ya basoda, mpe Baedome nyonso bakómaki basaleli ya Davidi;+ mpe Yehova azalaki se kobikisa Davidi na esika nyonso oyo azalaki kokende.+
15 Bongo Davidi akobaki koyangela Yisraele mobimba;+ mpe Davidi azalaki se kosambisa mpe kokata makambo na boyengebene+ mpo na bato na ye nyonso.+
16 Mpe Yoabe+ mwana ya Zeruya azalaki mokonzi ya basoda; mpe Yehoshafate+ mwana ya Ahilude azalaki mokomi-makambo.
17 Zadoke+ mwana ya Ahitube mpe Ahimeleke+ mwana ya Abiatare bazalaki banganga-nzambe, mpe Seraya azalaki sɛkrɛtɛrɛ.
18 Benaya+ mwana ya Yehoyada azalaki mokonzi ya Bakerete+ mpe Bapelete.+ Kasi bana mibali ya Davidi bakómaki banganga-nzambe.*+
Maloba na nse
^ To, “bakapita-bakonzi.”
