1 Timote 5:1-25
5 Kopamela mokóló na maloba makasi te.+ Kasi bondelá ye lokola tata, bilenge mibali lokola bandeko mibali,
2 basi oyo bazali mikóló+ lokola bamama, bilenge basi lokola bandeko basi+ na makanisi ya pɛto mpenza.
3 Kumisá basi oyo mibali bakufá oyo bazali mpenza na moto ya kosalisa bango te.+
4 Kasi soki mwasi moko oyo mobali akufá azali na bana to bana ya bana, bango báyekola kosalela ezaleli ya kokangama na Nzambe libosoliboso na ndako+ na bango moko mpe bákoba kozongisela baboti+ na bango ná bankɔkɔ na bango bolamu oyo basengeli kozongisela bango, mpo yango endimami na miso ya Nzambe.+
5 Sikoyo mwasi oyo azali mpenza mwasi oyo mobali akufá mpe atikalá mabɔkɔ mpamba+ atyeli Nzambe elikya+ mpe atingamaka na malɔmbɔ mpe na mabondeli butu moi.+
6 Kasi oyo amipesá na bisengo ya nzoto+ akufá+ atako azali na bomoi.
7 Yango wana, kobá kopesa mitindo oyo,+ mpo báfundama na likambo te.+
8 Ya solo, soki moto azali te kopesa bato na ye,+ mpe mingimingi bato ya ndako na ye,+ biloko oyo basengeli na yango, awangani+ kondima+ mpe azali mabe koleka moto oyo azali na kondima te.
9 Mwasi oyo mobali akufá oyo bakokoma nkombo na ye mpo asalisama, mbula na ye ezala na nse ya mbula ntuku motoba (60) te, azalaki mwasi ya mobali kaka moko,+
10 azala mwasi oyo bapeseli ye litatoli mpo na misala ya malamu,+ soki abɔkɔlaki bana,+ soki ayambaki bapaya,+ soki asukolaki makolo ya basantu,+ soki asalisaki baoyo bazalaki na bolɔzi,+ soki alandaki na molende mpenza mosala nyonso ya malamu.+
11 Nzokande, boyá bilenge basi oyo mibali bakufá, mpo ntango bamposa na bango ya kosangisa nzoto eyei komitya na katikati na bango ná Kristo,+ balingaka kobala,
12 bazali kokwea na likambo mpo batyoli liloba na bango ya liboso oyo etali kondima.+
13 Kaka na ntango yango mpe balingaka lisusu kosala mosala te, batambolatambolaka na bandako; ɛɛ, basalaka mosala te, mpe bazali bato ya bilobaloba mpe bamikɔtisaka na makambo ya bato,+ balobelaka makambo oyo basengeli kolobela te.
14 Yango wana, nalingi ete bilenge basi oyo mibali bakufá bábala,+ bábota bana,+ bákamba ndako, mpo na kopesa motɛmɛli nzela ya kofinga te.+
15 Kutu, bamosusu bapɛngwi mpo na kolanda Satana.
16 Soki mwasi moko mondimi azali na bandeko na ye oyo bazali basi oyo mibali bakufá, ye asalisa bango,+ mpe lisangá emema mokumba wana te. Bongo lisangá esalisa basi oyo mibali bakufá oyo bazali mpenza na moto ya kosalisa bango te.+
17 Bankulutu oyo bazali kokamba+ na ndenge ya malamu mpenza bátángama bato babongi na lokumu mbala mibale,+ mingimingi mpenza baoyo bazali kosala mosala makasi ya koloba mpe ya koteya.+
18 Mpo likomami ezali koloba ete: “Osengeli kokanga ngɔmbɛ monɔkɔ te ntango ezali kotutatuta mbuma”;+ lisusu: “Mosali asengeli kozwa lifuti na ye.”+
19 Kondima te likambo oyo bafundi na yango nkulutu, longola kaka na monɔkɔ ya batatoli mibale to misato.+
20 Pamelá+ na miso ya bato nyonso baoyo bazali na momeseno ya kosala lisumu,+ mpo bamosusu mpe bábanga.+
21 Nazali kopesa yo mitindo mpenza liboso ya Nzambe mpe ya Kristo Yesu+ mpe ya baanzelu oyo baponamá ete obatela makambo oyo na makanisi mabe te, ntango ozali kosala makambo, kopona elongi ya moto te.+
22 Kotyela moto mabɔkɔ+ nokinoki te;+ kosangana mpe na masumu ya bato te;+ zalá ntango nyonso pɛto.+
23 Komɛla lisusu mai te, kasi salelá nde mwa vinyo+ moke mpo na estoma na yo mpe bamaladi oyo obɛlabɛlaka.
24 Masumu ya bato mosusu emonanaka polele,+ ezali komema mbala moko na lisambisi, kasi masumu ya bato mosusu eyaka komonana polele na nsima.+
25 Ndenge moko mpe misala ya malamu emonanaka polele,+ mpe ata soki ezali komonana polele te ekobombama te.+
