Buku moko (World Religions in Denmark) ya eteyelo ya ntei oyo ebimaki na 2007, elobelaki Batatoli ya Yehova lokola mwa bakristo oyo balandaka mpenza Biblia. Kasi, Batatoli ya Yehova bazali lingomba ya misato ya monene ya bokristo na kati ya Danemark.

Nzokande, episkɔpɔ ya lingomba moko monene na Danemark atyolaki makasi ndenge mokomi ya buku wana atángaki Batatoli ya Yehova na buku na ye. Mpo na nini? Episkɔpɔ yango alobi boye: “Naino namoná te moto moko ya teoloji oyo atángi [Batatoli ya Yehova] na molɔngɔ ya bakristo. Baboyaka kondima Bosato, oyo ezali mpenza liteya monene ya lingomba ya bokristo.”

Annika Hvithamar, mokomi ya buku yango, oyo azali profɛsɛrɛ molandi na eteyelo ya filozofi na iniversite moko amonisi polele ete ntango batunaka bato mpo na nini balobaka ete bazali bakristo, balobaka te ete mpo bandimaka ete Nzambe azali Bosato. Lisusu, eteni moko ya buku yango oyo ezali na motó ya likambo ete “Ozali mokristo?” elobi ete: “Liteya ya Bosato ezali moko ya makambo ya mpasi na mateya ya teoloji.” Ebakisi boye: “Ntango nyonso, ezalaka mpasi kolimbola liteya yango epai ya bato oyo bayebi teoloji te, ntina oyo Nzambe oyo bakristo bandimaka azali Nzambe kaka moko kasi te banzambe misato.”

Makambo oyo Biblia eteyaka mpo na Nzambe mpe Yesu ezali polele mpe pɛtɛɛ. Ezali mpasi te mpo na kokanga ntina na yango. Ezala liloba “Bosato” to liteya yango ezali te na kati ya Liloba ya Nzambe. Biblia emonisi polele ete Yesu Kristo azali mwana ya liboso ya Nzambe. (Bakolose 1:15) Emonisi mpe ete Yesu azali ‘moyokanisi kati na Nzambe ná bato.’ (1 Timote 2:5) Mpo na Tata, Biblia elobi: “Yo, oyo nkombo na yo ezali Yehova, Yo moko nde Oyo-Aleki-Likoló na mabele mobimba.”​—Nzembo 83:18.

Batatoli ya Yehova bandimaka ete kondimela Yesu ezali na ntina mingi. (Yoane 3:16) Mpo na ntina yango, bazwaka na lisɛki te etinda oyo ya Yesu: “Ekomamá ete: ‘Osengeli kosambela nde Yehova Nzambe na yo, mpe kaka ye moko nde osengeli kosalela mosala mosantu.’” (Matai 4:10) Ya solo mpenza, moto oyo asalaka makasi mpo na kotosa mitinda ya Yesu akoki kobengama mokristo.