Kotungisama na makanisi epanzani na mokili mobimba

YOKÁ NA

“Natungisamaka mwa moke na makanisi ata ntango likambo moko esalemi te.”

“Soki nazali komiyoka ete nazali mpenza malamu, nakómaka kobanga. Mpo nayebaka ete lokola nazali ‘malamu’ na nsima na yango nakómaka ‘mawamawa.’”

“Nasalaka makasi ya kotya makanisi na makambo oyo ezali kosalema na mokolo, kasi na bantango mosusu na mbalakaka nakómaka komitungisa na makanisi mpo na makambo mingi.”

Ekómela yo mpe omiyoka ndenge moko na bato oyo bazali kobɛla na makanisi? Ozali kokutana na mokakatano yango to moninga to moto moko ya libota na yo azali kokutana mpe na mokakatano yango?

Omindimisa ete ozali yo moko te. Kobɛla na makanisi ezali kokómela moto nyonso lelo oyo.

Kozanga kotya ntembe, tozali kobika na “ntango moko ya mpasi mpenza mpe ya mikakatano” oyo ezali kosala ete mitungisi ekóma mingi mpenza. (2 Timote 3:1) Bolukiluki moko emonisi ete, na mokili mobimba, ekoki kozala moto moko na kati ya bato mwambe azali kobɛla na makanisi. Na 2020, maladi mabe ya Coronavirus esalaki ete bato mingi (soki 26%) bakóma kobɛla na makanisi koleka ndenge ezalaki na 2019, mpe bato mingi (soki 28%) bazali konyokwama makasi na makanisi koleka na 2019.

Esuki kaka te ya koyeba ndenge bato mingi lelo oyo bazali na mitungisi mpe kobɛla na makanisi, kasi likambo oyo eleki ntina ezali ya koyeba ndenge oyo yo to moninga na yo to mpe moto moko ya libota na yo bokoki kosala mpo bómiyoka malamu na makanisi.

Komiyoka malamu na makanisi ezali nini?

Kozala na sante ya malamu na makanisi esalisaka biso tómiyoka malamu mpe nzoto na biso esala na ndenge oyo ebongi. Yango ekoki kosalisa yo olonga mitungisi ya mikemike, kozwa makasi mpe kosepela na bomoi.

Kobɛla na makanisi . . .

EZALI TE bolɛmbu oyo tokoki kozala na yango nsima ya kosala likambo moko.
EZALI maladi oyo epesaka moto mpasi mingi mpe ebebisaka makanisi, mayoki mpe bizaleli ya moto.
Ekoki kozala mpasi mpo na moto ya kosala boninga na basusu mpe kolonga mikakatano ya mokolo na mokolo ya bomoi.
Ekoki kokómela moto ya mbula nyonso, mimeseno nyonso, loposo nyonso, ekólo nyonso, lingomba nyonso, ezala otángá to te, to mpe ozali mobola to mozwi.

Luká lisalisi ya monganga

Soki omoni bilembo oyo epai na yo to moninga na yo to mpe epai moto moko ya libota na yo: Mbongwana ya bomoto, mpɔngi kokimakima, mokakatano mpo na kolya to komitungisa oyo eumeli mingi, komitungisa na makanisi to mawamawa, esengeli koluka lisalisi mpo na koyeba mpo na nini ozali komiyoka bongo mpe kozwa lisalisi oyo ebongi mpo na kosilisa yango. Kasi epai wapi okoki kozwa lisalisi?

Yesu Kristo, moto oyo alekaki bato nyonso na bwanya, alobaki ete: “Bato ya nzoto kolɔngɔnɔ bazalaka na mposa ya monganga te, kasi nde bato oyo bazali kobɛla.” (Matai 9:12) Bato oyo bazwaki lisalisi ya monganga mpe bankisi oyo ebongi mpo na mokakatano na bango ya sante, bamiyokaki malamu mpe yango esalaki ete ekitisa bilembo ya maladi. Ezali likambo ya bwanya ya koboya kolekisa ntango molai mpo na kozwa lisalisi ya monganga, mingimingi ntango tokómi komona ete bilembo ekómi makasi mpe ezali koumela. a

Atako Biblia ezali te buku ya minganga, makambo oyo ezali na kati ekoki kosalisa biso tóyoka malamu na makanisi. Tosɛngi yo otánga lisolo oyo elandi oyo elobeli ndenge oyo Biblia ekoki kosalisa yo omiyoka malamu ntango ozali kobɛla na makanisi.

a Zulunalo Linɔ́ngi ya Mosɛnzɛli etindi moto te andima lisalisi boye to boye ya minganga. Moto na moto asengeli kotalela malamu nini akosala liboso azwa ekateli.